Moskva bununla Bakı və Ankaranı mümkün anti-terror əməliyyatından çəkindirmək istəyir
“Qarabağda müvəqqəti yerləşdirilən Rusiya sülhməramlıları dayandıqları bütün postlarda (27 post) “təhlükəsizliyin təmin edilməsi və mümkün pozuntuların qarşısının alınması” adı altında təlimlər keçiriblər”. Bu sözləri “Şərq”ə siyasi şərhçi Asif Nərimanlı deyib. Ekspert bildirib ki, bu, türk ordusunun işğaldan azad edilmiş ərazilərə gəlişinin anonsu olan Laçın təliminə cavabdır: “Rus sülhməramlılar bundan öncə Laçında təlim keçirdi və dronlara qarşı “döyüş məşqi” etdi. Bakı və Ankara məhz Laçında - rus sülhməramlıların dayandığı dəhlizin bir neçə yüz metrliyində cavab verdi. Ruslar da cavabı gecikdirmək istəmir. Sülhməramlıların “postları”nın erməni terrorçulardan qorunması məşqinin edilmədiyi aşkar məsələdir”.
Analitikə görə, Moskva bununla Bakı və Ankaranı mümkün anti-terror əməliyyatından çəkindirmək istəyir:
“Azərbaycan-Türkiyənin quruda, havada və dənizdə keçirdiyi təlimlər, ardınca Pakistanın da iştirak etdiyi “Üç Qardaş – 2021” xüsusi təyinatlı qüvvələrin təlimlərinin başlanması rusları narahat edir. Moskva anlayır ki, Azərbaycan üçtərəfli razılaşmanın bütün bəndlərinin icrası məqsədilə öz suveren ərazisində hərbi addımlar ata bilər və bu prosesdə tək olmayacaq. Baş verənlər Qarabağda “əsəb müharibəsi”nin getdiyini göstərir. Lakin bu dəfə əsas tərəf ruslardır və bunun nəticəsi hansısa formada olmalıdır”.
İsmayıl
