Xəbər verdiyimiz kimi, Bakıda minik avtomobilinin sürücüsü moped sürücüsünü döyərək, təhqir edib. Mopedi idarə edən Murad Salmanın paylaşdığı görüntülər sosial şəbəkələrdə geniş müzakirə predimetinə çevriib və hadisəni törədən "Lexus” sürücüsü şiddətlə qınanıb.
Qeyd edək ki, "Lexus” markalı, 10-VX-707 dövlət nişanlı avtomobilin sahibi və sürücüsü Sultan Tofiq oğlu Dadaşov 2 il əvvəl Prezident İlham Əliyev tərəfindən 3-cü dərəcəli "Əmək” ordeni ilə təltif edilib. Onun Azərbaycan Respublikası Prezidentinin İşlər İdarəsində inzibati xarakterili vəzifə tutduğu da bildirilir.
Qaynarinfo-nun yaydığı məlumata görə, "Lexus” sürücüsü Sultan Tofiq oğlu Dadaşov saxlanılıb və məhkəmənin qərarı ilə barəsində 25 sutkalıq həbs qərarı verilib.
Sosioloq Lalə Mehralı məmurun davranışını “Sherg.az”a açıqlamasında tənqid edib. O, belə hallar üçün öz təklifini irəli sürüb:
“Əvvəllər də buna bənzər hadisələr baş verib. Bununla bağlı Prezident İlham Əliyev dəfələrlə lazımı tədbirləri görüb. Öncəki hallarda da harınlıq, vəzifəsindən sui-istifadə edənlər cəzalandırılıb. Yetər ki, dövlət başçısına məlumat verilsin. Artıq mətbuatda da yayılıb ki, həmin şəxs tutduğu vəzifədən azad edilib və müvafiq olaraq cəzalandırılıb. Təklif edirəm ki, belə hallarda oğurluq edən şəxslərin, narkotik istifadəçilərinin üzr videoları yayıldığı kimi, bu insanların da üzr videosu paylaşılsın. Bu cür hallarda həm digər məmurlar dərs alır, həm də ictimaiyyətin qınağı yerinə yetirilmiş olur. Ümumilikdə məmurlar anlamalıdırlar ki, bu cür davranmağın nəticəsi nə olacaq. İnsan vəzifəyə gələ bilər, gedə də bilər. Vəzifə heç kim üçün daimi deyil. Amma illərlə qazandığı ad-sanı, hörməti, nüfuzu bir göz qırpımında itirməyi heç kim istəməməlidir”.
Sosioloq hesab edir ki, adıçəkilən şəxs tutduğu əməldən də peşman deyil:
“Həmin şəxs açıqlama verib ki, təzyiqi qalxdığına görə belə davranıb. Hesab edirəm ki, o şəxs davranışından peşman olduğu üçün belə açıqlama verməyib. Əgər hadisə gizli qalsa idi,kamera olmasaydı, yenə də bu cür davranmağa davam edəcəkdi. Çünki onlar artıq alışıblar. O, yalnız səhvinin səbəb olacağı şeylər üçün peşmanlığını dilə gətirir”.
