İstanbul Böyükşəhər Bələdiyyəsi və Türkiyənin müxalif Cümhuriyyət Xalq Partiyasının bəzi digər bələdiyyələrinə qarşı aparılan korrupsiya istintaqı çərçivəsində Beyoğlu Bələdiyyəsinin başçısı İnan Güneyin də aralarında olduğu daha 42 şübhəli saxlanılıb.
AZƏRTAC xəbər verir ki, İstanbul Baş Prokurorluğu tərəfindən həbs edildikdən sonra İstanbul Böyükşəhər Bələdiyyəsinin başçısı vəzifəsindən uzaqlaşdırılan Əkrəm İmamoğlunun da aralarında olduğu təqsirləndirilən şəxslər barəsində cinayət təşkilatına rəhbərlik etmək, cinayət təşkilatına üzv olmaq, vəzifə səlahiyyətlərindən sui-istifadə edərək mənfəət əldə etmək, rüşvət, xüsusi dələduzluq, şəxsi məlumatları qanunsuz yolla ələ keçirmək və tenderə müdaxilə edərək saxtakarlığa yol vermək ittihamları ilə aparılan istintaq davam edir. Bu çərçivədə aparılan araşdırmalarda bir sıra dələduzluq əməliyyatlarında iştirak etdiyi müəyyən olunan İnan Güneyin də daxil olduğu 35 şübhəli müəyyənləşdirilib. Daha 9 nəfərin isə maddi qazanc məqsədilə cinayət təşkilatının sosial media strukturu ilə əlaqələsi aşkarlanıb. Şəxsiyyətləri müəyyən edilən 44 təqsirləndirilən barəsində həbs qərarı çıxarılıb. Bu istiqamətdə eyni vaxtda keçirilən əməliyyat nəticəsində şübhəlilərdən 42-i saxlanılıb. İstintaq davam edir.
