Bütün ermənilərin katolikosu II Qaregin tezliklə istefa verəcək.
Bu barədə “Joqovurd” qəzeti Ermənistan hökumətindəki mənbələrə istinadla məlumat yayıb.
Erməni nəşri yazır: “Hakim elita əmindir ki, katolikos tezliklə istefa verəcək. Qəzetimizin hökumətdəki mənbələri iddia edirlər ki, katolikosun başqa çıxış yolu yoxdur, o, Baş nazir Nikol Paşinyana təslim olmaq məcburiyyətində qalıb. Hökumət mənbələri deyirlər ki, təzyiqlər günbəgün artdıqca onun çıxış yolu olmayacaq”.
Xatırladaq ki, bundan əvvəl Ermənistan Baş naziri bütün ermənilərin katolikosu II Qregini subaylıq andını pozmaqda ittiham edib. Paşinyanın sözlərinə görə, subaylıq andını pozaraq övlad sahibi olan Qaregin artıq Erməni Apostol Kilsəsinin rəhbəri ola bilməz.
Ermənistan hökumətinin başçısı Erməni Apostol Kilsəsinə yeni katolikosun seçilməsi üçün seçkilərə və koordinasiya qrupunun yaradılmasına çağırıb.
Cross Media Təhlil Mərkəzinin analitiki, siyasi şərhçi Mübariz Göyüşlü Sherg.az-a deyib ki, Paşinyan və Qaregin arasında çox sərt mübarizə gedir:
"Ermənistan Baş nazirinin bu gərginlikdən qalib çıxması daha məqsədəuyğundur. Çünki kilsə Ermənistanı bəlaya sürükləmiş bir strukturdur. Hətta kilsə təşkilatçılığı dindən başqa bütün çirkin əməllərlə məşğul olur. Həmçinin Azərbaycan xalqına qarşı qəddar erməniçiliyin, daşnaksütun ideyasının yayılması istiqamətinin əsasında kilsənin xüsusi rolu var. Bu mənada həm erməni, həm də bölgə xalqlarını faciəvi vəziyyətlərə sala biləcək, din adına yaraşmayan şəxslərin qarşısını almaq üçün kilsədə islahatlar keçirilməlidir. Paşinyanın qalibiyyəti isə onun gücündən, prosesi xalqa düzgün izah edərək dəstək almasından asılıdır. Erməni kilsəsinin bu məsələlərdən kənarlaşdırılmasına çox ciddi ehtiyac var".
