Qurum ani bir qərəzdə belə təmkinli olaraq obyekt yanaşma ortaya qoymaqdansa, birbaşa qarşı tərəfi "lənətləməyə" başlayır
"AŞPA-nın Gürcüstana qarşı sərgilədiyi mövqe ənənəvi "Avropa Şurasından başqası yalandır" kimi özünü bəyənmişlik sindromundan başqa bir şey deyil. Digər Avropa rəsmiləri və qurumları kimi AŞPA da dünyanı tək Avropadan ibarət görür".
Bu sözləri "Sherg.az"a açıqlamasında siyasi şərhçi Həşim Səhrablı söyləyib.
Onun sözlərinə görə, sözügedən qurum hər şeyin onun diqtə etdiyi formada təzahür etməli olduğunu düşünür:
"AŞPA-nın istər Azərbaycan, istərsə də Gürcüstan siyasətində sadəcə bir məqsəd var: "Hər şeyi biz idarə edək, bizim istədiyimiz kimi olsun". Lakin AŞPA da haqlı mövqeləri və mövcud reallıqları da görməlidir. Həmçinin başa düşməlidir ki, onun Azərbaycan və Gürcüstana yanaşması Avropanın milli maraqlarından ibarət olmamalıdır və tərəfsizlik, birgə işləmə mexanizmləri formasında baş tutmalıdır. Sözügedən qurum problemi olduğu dövlətlərə qarşı sanksiyalar tətbiq edir, onu nüfuzdan salma istiqamətində addımlar və s. Qurum ani bir qərəzdə belə təmkinli olaraq obyekt yanaşma ortaya qoymaqdansa, birbaşa qarşı tərəfi "lənətləməyə" başlayır. Bu isə günümüzün qlobal problemləri çərçivəsində heç də doğru deyil. Bütün bunlarla yanaşı, zaman-zaman AŞ-nin imicini və onunla tərəfdaş olmaq istəyən ölkələrin sayını aşağı sala bilər. Dünyanın hazırkı geosiyasi vəziyyətinə baxsaq, təkcə AŞPA-nın yox, digər beynəlxalq təşkilatların da təsir gücünün və imicinin tamamilə itəcəyini gözləyə bilərik. Hətta bir sıra təşkilatlar sıradan çıxacaq və əvvəlkilər qədər ciddi mövqeyə malik olmasa da, yeniləri yaranacaq. Məhz, BMT-nin varlığının geniş siyasi islahatlar həyata keçirilməsi ilə mümükün olacağından danışırıqsa, AŞPA o qədər də böyük qurum deyil".
Şərhçi əlavə edib ki, AŞPA böhrandan çıxmaq üçün "Avropa bütün dünyadan üstündür" xülyasından çıxmalıdır:
"Rusiya, Çin və Türkiyənin Qərbin hegemoniyasına qarşı göstərdiyi dirəniklər müvəffəqiyyətlə başa çatarsa, AŞPA-da ciddi say azalması görə bilərik. Yəni Rusiya Şərqi Avropada işğal siyasətini legitimləşdirərsə, Çin Tayvan və digər məsələlər üzərində Qərbə qalib gələrsə, Türkiyə Yaxın Şərq, Cənubi Qafqaz, ümumiyyətlə ümumtürk coğrafiyasında maraqlarını həyata keçirərsə, bunun şahidi olacağıq. Çünki qurumun tərkibindəki dövlətlərin çoxu yeni reallıqlarla hərəkət edəcəklər. Öz maraqlarını artıq Avropanın mərkəzində görməyəcəklər".
