Xəzər dənizinin dayazlaşmasının qarşısının alınması üzrə Rusiya-Azərbaycan proqramının gələn ilin birinci rübündə qəbul edilməsi planlaşdırılır.
“Report”un verdiyi məlumata görə, bunu Bakıda səfərdə olan Rusiyanın təbii sərvətlər naziri Aleksandr Kozlov Azərbaycanın ekologiya və təbii sərvətlər naziri Muxtar Babayevlə görüşündə deyib.
A.Kozlov qeyd edib ki, Xəzər dənizinin səviyyəsinə əsasən iqlim faktorları təsir edir: “Dənizə axan çayların axınındakı təbii dalğalanmalar və onun səthindən buxarlanmanın intensivliyi də təsir edən faktordur. Yəni, səviyyə iqlim dəyişikliyindən təsirlənir. Onu da dayandırmaq mümkün olmur. Yalnız davam edən dəyişikliklərə uyğunlaşa bilərsiniz. Məhz bu uyğunlaşma tədbirlərini biz 2025-ci ilin birinci rübündə qəbul edəcəyimiz Rusiya-Azərbaycan proqramımıza daxil edəcəyik”.
Həmçinin görüş zamanı tərəflər ətraf mühitin mühafizəsi sahəsində əməkdaşlıq haqqında hökumətlərarası sazişin bağlanmasını da müzakirə ediblər.
Buraya Xəzər dənizi ilə bağlı məsələlərlə yanaşı, bioloji müxtəlifliyin qorunması, qorunan ərazilərin inkişafı və bərk məişət tullantılarının idarə edilməsi kimi sahələrdə Rusiya və Azərbaycan arasında qarşılıqlı fəaliyyət də daxil olacaq.
