Hər ilin 24 aprel tarixində xüsusi canfəşanlıqla tirajlanan "qondarma erməni soyqırımı" teatral şoudan başqa bir şey deyil
"Rəsmi Bakı Ermənistan və Fransada Azərbaycanla Türkiyə bayraqlarının yandırılmasını pisləyir". Bunu xarici işlər naziri Ceyhun Bayramov Avropa İttifaqının xarici işlər və təhlükəsizlik siyasəti üzrə ali nümayəndəsi Kaya Kallasla birgə mətbuat konfransında deyib. Nazir bildirib ki, bölgədə narazılıq mənbəyi olaraq Ermənistanda revanşist meyillərin hələ də mövcud olması ciddi narahatlıq doğurur:
“Revanşist meyillər dedikdə bu günlərdə Azərbaycan və Türkiyə bayraqlarının yandırılması faktlarına nəzər salmaq istərdim. Eyni hadisə əfsuslar olsun ki, dünən Fransada baş verib. Bizim gözləntimiz ondan ibarətdir ki, bu ölkələrin müvafiq strukturları digər ölkənin atributlarının yandırılmasının cinayət əməli kimi qiymətləndirilməsi üçün ciddi addımlar atsın”. Məlumat üçün bildirək ki, Ermənistanın paytaxtı İrəvanda qondarma erməni “soyqırımı” ilə bağlı təşkil olunan yürüşdə növbəti dəfə təxribata əl atılıb. Yürüş iştirakçıları Türkiyə və Azərbaycan bayraqlarını yandırıblar. Bundan sonra onlar əllərində məşəllərlə yürüşə başlayıblar. Qeyd edək ki, analoji tədbirlər 2000-ci ildən bəri hər il Ermənistanda keçirilir. Bundan öncəki illərdə də iştirakçılar Azərbaycan və Türkiyə bayraqlarını yandırmışdı.
Hərbi ekspert Ədalət Verdiyev deyib ki, Ermənistan tərəfindən hər ilin 24 aprel tarixində xüsusi canfəşanlıqla tirajlanan "qondarma erməni soyqırımı" teatral şoudan başqa bir şey deyil. Ekspertin fikrincə, Ermənilərin bəşər tarixinə demək olar ki, insanlıq və sülh adına müsbət bir töhfə vermədiyini, əsasən adı terror, separatizm, ekstremizm və satqınçılıq ilə bərabər çəkildiyini nəzərə alsaq, o zaman Osmanlının kütləvi köçürmə ilə əlaqəli davranışları anlaşılandır:
"Əgər belə bir "soyqırımı" baş veribsə, o zaman Ermənistan guya öldürülən 1.5 milyon erməninin ad, soyad, ata adı, doğum yeri və təvəllüdü göstərilməklə siyahını təqdim etsin. "Öldürülənlərin" dəfn edildiyi qəbiristanlıqların yerini və adını açıqlasın. "Soyqırımı" qurbanlarının varislərinin ad, soyad və ata adlarını təqdim etsin. Erməni əhalinin ümumi sayının "soyqırımı qurbanlarının" sayından az olmasına aydınlıq gətirsin. Türkiyə kimi arxivlərini tarixçilər açıq elan etsin, beynəlxalq araşdırmalar üçün şərait yaratsın. Həmçinin, Azərbaycan ərazisində ermənilərin Baqanis Ayrım, Xocalı, Quşçular, Malıbəyli, Edili, Başlıbel, Qaradağlı, Gəncə, Tərtər, Bərdə və s. kimi yaşayış məntəqələrində törətdiyi soyqırımlara görə üzr istəsin. Ermənistandan fərqli olaraq Azərbaycan adıçəkilən ərazilərdə ermənilər tərəfindən qətlə yetirilən mülki əhaliyə aid bütün məlumatları təqdim edə bilir".
