Avropa İttifaqının Ermənistandakı müşahidə missiyasının üzvləri Zəngilan rayonu ilə həmsərhəd əraziyə gəliblər. Onlar avtomobillərlə yolboyu hərəkət edib, binoklla Azərbaycan ərazilərini müşahidə ediblər. Azərbaycan sərhədçiləri müşahidə missiyasının hərəkətlərini nəzarət altında saxlayaraq qeydə alıblar. Xatırladaq ki, Avropa İttifaqının Ermənistandakı müşahidə missiyası mütəmadi olaraq Azərbaycanla sərhədboyu müşahidələr aparır. Qeyd edək ki, Avropa İttifaqının Ermənistanın Azərbaycanla sərhədindəki 200 nəfərlik müşahidə missiyasının mandatı daha iki il - 19 fevral 2027-ci ilədək uzadılıb.
Azad Vətən Partiyasının sədri Akif Nağı deyib ki, Azərbaycan ərazilərinin davamlı şəkildə hansısa ölkələrin nümayəndələri tərəfindən binoklla müşahidə olunması beynəlxalq hüquq normalarına birbaşa ziddir:
"Razılığımız olmadan heç kim bizi kənardan gizlicə izləyə bilməz. Bunun etik normalar və mənəvi-psixoloji baxımdan da qəbul ediləcək tərəfi yoxdur. Nümayişkaranə şəkildə binoklların Azərbaycana tuşlanması yolverilməzdir. Birmənalı Aİ missiyasının nəzərinə çatdırmaq lazımdır ki, Azərbaycanı gizlicə izləmək doğru deyil və buna son verilməlidir. Missiya nəzdində yer alan bütün dövlətlərə rəsmi müraciət olunmalıdır ki, suveren hüquqlarımızın pozulmasına yol verməsinlər, daxili işlərimizə qarışmasınlar. Dəfələrlə vurğulanıb ki, Aİ missiyası başqa fəaliyyətlə məşğul olur, casusluq, kəşfiyyat məlumatları toplayırlar. Əsassız ittihamlarla ölkəmizi hədəf alırlar. Avropa İttifaqı özü nəzərə almalıdır ki, bu cür iddialar qurumun nüfuzuna zərbə vurur, olan-qalan imicini də zədələyir".
