Ermənistan höküməti əhalinin başını başqa məsələlərə qatmaqla siyasi mövzulardan uzaqlaşdırmağa səy göstərir
Fevralın 3-də saat 10:00-dan 15:00-dək Ermənistanın Tavuş rayonunun İcevan icmasının Lusahovit qəsəbəsində “Hava həyəcanı” siqnalı işə düşəcək. Bu barədə Ermənistanın yerli administrasiyası məlumat yayıb.
Bildirilib ki, bu, “əhalinin məlumatlandırılması, sığınacaq və evakuasiya tədbirlərinin təşkili” mövzusunda təlimlə bağlıdır.
Siyasi şərhçi Azər Həsrət “Sherg.az”a söyləyib ki, Ermənistan hakimiyyəti və bütövlükdə dövləti əhalini onlara hansısa xarici təhdidin olduğunu aşılayırlar:
“Eyni zamanda həmin xarici təhdidlərə hazırlıqların görülməsini başa salırlar. Xarici təhdid deyəndə təbii ki, onlar Azərbaycanı nəzərdə tuturlar. Ona görə də Avropa müşahidə missiyasının müddətini yenidən 2 il uzatdılar. Yəni bir növ ölkə əhalisini daimi qorxu altında tutmağa çalışırlar. Bu cür təlimlərin keçirilməsi də sözügedən məsələ ilə bağlıdır. Ermənistan höküməti əhalinin başını başqa məsələlərə qatmaqla siyasi mövzulardan uzaqlaşdırmağa səy göstərir. Beləliklə, davamlı olaraq ictimai rəyi manipulyasiya etməyə çalışırlar. Eyni zamanda həmin məsələ Fransanın şəxsində Avropa dövlətləri ilə də bağlıdır. Çünki onlar Ermənistanda özlərinin önəmini bu yolla sübut etməyə cəhd edirlər. Ermənistan hakimiyyəti Fransaya çox bağlıdır, hətta ermənilər Parisin əlinin altında işləməkdən zövq alırlar. Fransa da Azərbaycanı qıcıqlandırmaq üçün hər cür yaramaz yola əl atır. Amma onlar bir şeyi unudurlar ki, Azərbaycan belə məsələlərə aldanacaq dövlət deyil. Azərbaycanı Ermənistandan fərqli olaraq təcrübəli rəhbər idarə edir”.
