Bu gün Azərbaycan Respublikasının əsas qanununun - Konstitusiyanın qəbul edildiyi gündür.
"Sherg.az" xəbər verir ki, ölkə Konstitusiyası 29 il əvvəl - 12 noyabr 1995-ci ildə ümumxalq referendumu vasitəsilə qəbul edilib.
Bu, Azərbaycanın müstəqilliyini bərpa etməsindən sonra ilk Konstitusiyası idi.
Millət vəkili, Böyük Quruluş Partiyasının sədri Fazil Mustafa “Sherg.az”a bildirib ki, Konstitusiya günü bizim üçün əslində ən böyük atributlarımızın birinin qeyd olunduğu gündür:
“Bir dövlətin görünən simvolu bayraq və gerbdirsə, mənəvi mühitini formalaşdıran və insanların yaşamını şərtləndirən əsas sənəd konstitusiyadır. Bu sənədin də müstəqil dövlətin konstitusiyası olması bizim üçün özəl əhəmiyyət ortaya qoyur. 9 noyabr Bayraq Günü, 12 noyabr Konstitusiya günü əslində Zəfər günündən sonra ən böyük dəyərlərimizin xatırlanmasıdır. Konstitusiyanın bir dəyər olaraq görünməsi üçün insanlar həm onu dərindən öyrənməli, həm də onun verdiyi hüquq və vəzifələrə əməl etməlidirlər. Hansı ölkədə Konstitusiyaya hörmət göstərən vətəndaş çox olursa, orada problemlər də az olur. Ona görə də konstitusiya bizim üçün əlahiddə dəyərdir. Bizim həyatımızı, yaşamımızı tənzimləyən qanundur. Azərbaycan Konstitusiyası Azərbaycanın xalqının ən ciddi şah əsərlərindən biridir. 1995-ci ildə qəbul edilən Azərbaycanın Müstəqillik dövrünün ilk konstitusiyasıdır”.
