"Səhər saat 8-dən 61 saylı seçki dairəsinə daxil olan bütün məntəqələrdə seçkilər başlayıb. Təbii olaraq, hava şəraiti seçicilərin sayına təsir edir. Bir neçə məntəqədə elektrik kəsilib".
Bu sözləri "Sherg.az"a açıqlamasında 61 saylı Neftçala Seçki Dairəsindən namizədliyini irəli sürən təhsil eksperti Kamran Əsədov deyib.
Onun sözlərinə görə, Şirvanlı, Mayaq kimi ərazilərdə seçki aktivliyi aşağıdır. Əsas qayda pozuntusu isə bir neçə seçicinin özü ilə bərabər ailə üzvlərinin şəxsiyyət vəsiqəsini də gətirməsidir:
“Bu kimi halların da qarşısı müşahidəçilərimiz tərəfindən alınıb. Ən ciddi qayda pozuntuları Bankə qəsəbəsində qeydə alınıb. Məntəqə sədrləri əlavə seçici siyahısını pərdələrin arxasında saxlayır. Həmçinin vəfat edən şəxslərin adı seçki siyahısına salınıb. Digər qayda pozuntusu isə oxuma-yazma bilməyən seçicilərin komissiya üzvləri tərəfindən konkret şəxslərə səs verməyə çağırışıdır. Yəni fərqləndirci işarəni konkret olaraq hara qoyulacağını göstərirlər. Bu pozuntular Neftçalada 2 saylı məntəqədə aşkarlanıb. Halbuki komissiya üzvlərinin bu və ya digər namizədlərin xeyrinə və ya əleyhinə təbliğat-təşviqat aparması yolverilməzdir. Əlimizdə video faktlar var. Hər biri ilə bağlı protokol tətbiq edilib".
K.Əsədov deyib ki, Bankə qəsəbəsindəki hər 3 məntəqədə isitmə sisteminin olmaması müşahidəçilərin fəaliyyətinə mənfi təsir edir.
