Günay Ağamalı: “Vatikan səfəri Azərbaycanın tolerantlıq və multikulturalizm siyasətinin parlaq nümunəsidir”
Azərbaycanın Birinci vitse-prezidenti Mehriban Əliyevanın Vatikan şəhərinə rəsmi səfəri humanitar diplomatiya sahəsində atılmış mühüm addımlardan biri kimi qiymətləndirilir. Səfər çərçivəsində keçirilən görüşlər və aparılan müzakirələr Azərbaycan-Vatikan münasibətlərinin inkişafına xidmət etməklə yanaşı, mədəniyyətlərarası və dinlərarası dialoqun təşviqi baxımından da diqqət çəkir.
Rəsmi Bakı uzun illərdir multikulturalizm və tolerantlıq dəyərlərinin təşviqinə önəm verir. Bu istiqamətdə həyata keçirilən layihələr və beynəlxalq əməkdaşlıqlar Azərbaycanın bu sahədəki mövqeyini möhkəmləndirir.
Səfər həmçinin ölkənin qlobal səviyyədə sülh, əməkdaşlıq və mədəni dəyərlərə verdiyi önəmin bir ifadəsi kimi dəyərləndirilir.
Milli Məclisin deputatı, Ana Vətən Partiyasının sədr müavini Günay Ağamalı Sherg.az-a açıqlamasında Birinci Vitse-Prezident Mehriban xanım Əliyevanın Vatikan səfərinin Azərbaycanın humanitar diplomatiya istiqamətində atdığı növbəti mühüm addım kimi xüsusi əhəmiyyət daşıdığını qeyd edib:
"Bu səfər Azərbaycan və Vatikan arasında münasibətlərin inkişafına xidmət etməklə yanaşı, eyni zamanda mədəniyyətlərarası və dinlərarası dialoqun güclənməsi baxımından da böyük rəmzi məna daşıyır.
Azərbaycan multikulturalizm və tolerantlıq dəyərlərinə söykənən dövlət kimi dünyanın müxtəlif dini konfessiyaları və mədəniyyətləri arasında körpü rolunu oynayır. Mehriban xanım Əliyevanın fəaliyyəti bu siyasətin ən parlaq nümunəsidir. Onun rəhbərlik etdiyi Heydər Əliyev Fondunun həyata keçirdiyi humanitar təşəbbüslər, beynəlxalq səviyyədə mədəni irsə, dini abidələrin qorunmasına göstərdiyi diqqəti dünya ictimaiyyəti yüksək qiymətləndirir.
Vatikan səfəri Azərbaycanın dünya mədəniyyətinə, sülhə və qarşılıqlı anlaşmaya verdiyi töhfənin bir daha nümayişidir".
Parlamentari bu səfərin Azərbaycan xalqının əsrlər boyu formalaşmış tolerantlıq irsinin, qarşılıqlı hörmət və dəyərlərə əsaslanan yanaşmasının bariz təcəssümü olduğunu vurğulayıb:
"Mehriban xanım Əliyeva humanizm, və mədəni diplomatiyamızın simvoludur. Onun bu səfəri ölkəmizin beynəlxalq imicini daha da möhkəmləndirir, Azərbaycanın sülhsevər siyasətini və mədəni dəyərlərini dünyaya tanıdır".
