“Onların qəbul etdiyi qərar və qətnamələr ancaq boş kağızlardan ibarətdir”
“Dağlıq Qarabağ məsələsinə dair BMT-nin qətnamələrini, Minsk qrupunun öhdəliklərini bu gün Azərbaycan ordusu icra edir”
Sentyabrın 27-dən başlanan düşmən təxribatına qarşı ordumuz əks-hücum əməliyyatlarını davam etdirir. Rəşadətli əsgər və zabitlərimiz uğurla döyüşür və zəfər çalır. Demək olar ki, hər gün yeni qələbə xəbərləri alır,ordumuzla fəxr edirik. 30 ildən sonra ilk dəfə bu qədər qürurluyuq. Azərbaycan ordusu torpaqlarını işğaldan azad edərək öz dövlətinin şanlı tarix səhifəsini yazır.
Düşmən isə həmişə olduğu kimi amansızlığını, hiyləgərliyini göstərməyə davam edir. İllər əvvəl qəddar, qeyri-insani davranışlar sərgiləməklə dinc əhalini, günahsız körpələri qətl edən düşmən bu gün də çirkin əməllərindən əl çəkmir.
Müharibə başlayandan etibarən Ermənistan silahlı qüvvələri cəbhə bölgəsindən xeyli uzaqda yerləşən ərazilərə, mülki obyektlərə, sivil vətəndaşlara iri çaplı silahlardan atəş açır. İlk gündən Tərtər, Ağdam, Goranboy rayonlarını atəşə tutan düşmən ordusu daha sonra döyüş bölgəsindən 100 kilometr aralıda yerləşən, Azərbaycanın ikinci ən böyük şəhərini - Gəncəni raket hücumuna məruz qoydu.
Düşmənin növbəti hədəfi Bərdə şəhəri oldu. İki gün ardıcıl olaraq şəhərə raketlə hücum həyata keçirdi. Nəticədə isə onlarla insan həlak oldu və xəsarət aldı. Mənfur düşmən yenə əlini günahsız körpələrin, əliyalın insanların qanına batırdı.
Amma Ermənistanın bu əməllərinə beynəlxalq təşkilatlar adekvat reaksiyalar vermir. Bütün etdiklərinə rəğmən illərdir dünya ictimaiyyətinin qınağına məruz qalmadıqları üçün özlərini haqlı sayaraq daha da azğınlaşırlar. Dünya ölkələri və insan hüquqlarını müdafiə edən təşkilatlar Ermənistana heç bir təzyiq göstərmir. “Yollarına daş qoyan” olmadığı üçün bu hücumların ardı-arası kəsilmir.
Bu barədə “Sherg.az”a danışan Azərbaycan Demokratik İslahatlar Partiyasının sədri, Milli Məclisin deputatı, tibb elmləri doktoru Asim Mollazadə deyir ki, beynəlxalq təşkilatların Qarabağ münaqişəsi ilə bağlı qəbul etdiyi qərar və qətnamalər ancaq mənasız kağızlardır:
“Təəssüf ki, beynəlxalq təşkilatlar yenə də öz təməl prinsiplərinə əməl etmir, hüququn aliliyini dəstəkləmirlər. Humanist prinsiplərə əsaslanan bütün sənədlərdə mülki əhaliyə - uşaqlara, qadınlara və yaşlılara hücumların cinayət olduğunu qeyd etsələr də, buna göz yumurlar.
Məlum məsələyə dair BMT-nin qətnamələrini, Minsk qrupunun öhdəliklərini bu gün Azərbaycan ordusu icra edir. Ordumuzun əks-hücum əməliyyatları ilə bu gün onları sülhə məcbur etməyə çalışırıq.
Düşünürəm ki, Xocalı faciəsinə göz yuman, orada törədilən cinayətlər üçün ədalət hökmünü həyata keçirə bilməyən təşkilatlar imkan yaradır ki, həmin hərbi cinayətkarlar öz əməllərini təkrar etsinlər.
Bu gün Ermənistan cəbhə bölgəsindən kilometrlərlə uzaqda yerləşən şəhərlərə, yaşayış məntəqələrinə müxtəlif çaplı silahlardan hücum edir. Mülki əhaliyə qarşı amansızlıq göstərir və onları qətlə yetirir.
Məncə, bütün bunlara göz yuman ölkələrdə və beynəlxalq təşkilatlarda ədalət hökmü yox dərəcəsindədir.
Azərbaycan məcbur qalıb həmin təşkilatların funksiyalarını özü həyata keçirir. Onların qəbul etdiyi qərar və qətnamələr ancaq boş kağızlardan ibarətdir”.
Aytac Ali
