Ermənistan xarici işlər naziri Ararat Mirzoyan Türkiyəyə səfər edəcək.
APA Ermənistan Xarici İşlər Nazirliyinə istinadən xəbər verir ki, Mirzoyan 11-12 aprel tarixlərində Antalya Diplomatiya Forumunda iştirak edəcək.
Mirzoyanın işgüzar səfəri çərçivəsində ikitərəfli görüşləri də planlaşdırılıb.
Siyasi şərhçi Azər Həsrət “Sherg.az”a bildirib ki, Mirzoyanın Türkiyəyə səfəri ilk deyil:
“Bundan əvvəl də Türkiyə tərəfindən Ermənistan Antalya Diplomatiya Forumuna dəvət olunub. Ermənistan tərəfi də həvəslə tədbirdə iştirak edib. İki ölkə arasında münasibətlərin normallaşdırılması baxımından sözügedən səfər yerinə düşür. Qardaş Türkiyə təbii ki, durduq yerə Ermənistanı foruma dəvət etməyib. Görüş zamanı ikitərəfli, regional və qlobal məsələlərin müzakirəsi aparıla bilər. Bu baxımdan Ermənistan xarici işlər nazirinin Türkiyəyə səfərini təqdir belə etmək olar. Çünki Azərbaycan-Ermənistan arasında sülh prosesinin surətləndirilməsi baxımından qardaş Türkiyənin təsir imkanları çoxdur. Həmin imkanların belə platformalarda tətbiq edilməsi baxımından səfəri müsbət dəyərləndirmək lazımdır”.
