Bakı yeni reallıq qurur, Tehran və Yerevan təəccübdədir
Paşinyanın “kəsişmə” etirafı Zəngəzurun başqa adda qayıdışıdır
Ermənistanın Baş naziri Nikol Paşinyan ötən gün Türkiyəyə səfəri zamanı bu ölkədə yaşayan erməni əsilli şəxslərlə görüşündə bir sıra sualları cavablandırıb. Erməni əsilli şəxslər Azərbaycan və Türkiyənin “Turan” ideyasına dəstəyi, o cümlədən bu istiqamətdə Zəngəzur dəhlizinin açılması istəyindən söz açıblar. Paşinyanın onlara cavabı isə böyük maraqla qarşılanıb. Baş nazir bildirib ki, Ermənistan magistralda hərəkət edərkən avtomobillərin altında qalan, daha sonra ayağa qalxan, lakin təkrar yıxılan obyekt kimidir: "Niyə yıxıldığımızı anlamırıq, lakin bunu başa düşməliyik. Dünyanın inkişaf etmiş heç bir ölkəsinin qonşuları ilə sərhədləri bağlı deyil. İndi hamını bir məsələ düşündürür: “Turan birliyi”. Onların məqsədi budur. Ermənistan ərazisindən keçməklə bir-biriləri arasında hərəkət etmək istəyirlər? Qoy, olsun. Bunun nəyi pisdir? Onlar şərqdən qərbə, şimaldan cənuba getmək istəyirlər? Biz razıyıq, nə problem var? Niyə getməsinlər? Beləliklə, bizim də sərhədlərimiz açılsın”.
Beynəlxalq məsələlər üzrə ekspert Əziz Əlibəyli deyib ki, bir müddət əvvəl Azərbaycan Zəngəzur dəhlizi anlayışının ifadə səviyyəsini yuxarı vəzifəli şəxslərdən aşağı ranqlı vəzifəli şəxslərin istifadəsinə qədər endirdi. Ekspertə görə, bir çoxları bunu Azərbaycanın Zəngəzur dəhlizindən imtinası kimi başa düşdü, amma məsələnin mahiyyəti tamamilə fərqli idi:
"Azərbaycan "Zəngəzur dəhlizini açmalıyıq" dedikcə, Ermənistanda və dünyadakı bir çox güclər bunu bizə qarşı təzyiq, müharibə, revanş vasitəsi kimi görərək Ermənistanı daha da ortaya atıb qızışdırdılar. Azərbaycan başa düşdü ki, Zəngəzur dəhlizinə qarşı çıxan ağıl və qırmızı xətlər ona məxsus ağlın məhsulu deyil. Ona görə alternativlərə yönəldi. Gündəmindən söz olaraq Zəngəzur dəhlizi ifadəsini çıxardı. Naxçıvana İrandan yol çəkdi. "Bir kəmər, bir yol" layihəsini isə Gürcüstandan keçirməyə qərar verdi. Məhz ortada yaranan kəskin sükutdan sonra Ermənistan aldadıldığını, istifadə edildiyini və xüsusilə İran tərəfdən "kullanıldığı"nı anladı. İndi Paşinyanın Türkiyə səfərində səsləndirdiyi "Ermənistan kəsişməsi" dediyi məhz Zəngəzur dəhlizidir. Sadəcə, Paşinyanın daxili müxalifət qarşısındakı gücü o qədər azdır ki, bunun onun sonu ola biləcəyini də başa düşür. Nitqini belə bitirir ki, "sabah Azərbaycan Ermənistan kəsişməsinə Zəngəzur dəhlizi desə, məni də düzgün başa düşün". Hər halda zamanlama da gözəl idi. Naxçıvana dair qanunvericilikdə dəyişiklik və yeni yanaşmaların tələbi Zəngəzuru hüquqi çərçivəyə salır. Üstəgəl, Qərbi azərbaycanlıların məsələsi qaldırılır".
