Türkiyənin Balıkəsir bölgəsi uzunömürlülərin məkanı sayılır. Balıkəsirin Gönən əyaləti, Üzümlü məhəlləsinin sakini 100 yaşlı Rəcəb Ercan bu il 100 yaşını tamamlayıb.
Sherg.az “NTV.com.tr”yə istinadən bildirir ki, 100 yaşını doldurması səbəbiylə “bir əsrlik çinar” titulunu da qazanan Rəcəb Ercan sağlam həyatın sirrini də bölüşüb. Ömrü boyu əkinçiliklə məşğul olan, bir vaxtlar məhəllə muxtarlığı da edən Rəcəb dədə üçün kənddə təntənəli ad günü şənliyi keçirilib. Üç övladı, səkkiz nəvəsi və səkkiz də nəticəsi olan Rəcəb dədə çinar kimi möhkəm, sağlam qalmağın sirrini “kədərlənməmək, təbii qidalar yemək, süfrədə həmişə qatıq, ayran, tərəvəz olması” ilə izah edib. Rəcəb Ercan deyib ki, həyatı boyunca bu 3 qidanı süfrəsindən əskik etməyib. Az, amma təbii qidalanmağa üstünlük verib. Rəcəb dədənin ailəsi və qonşularının təşkil etdiyi ad günü şənliyi duyğulu anlarla yadda qalıb.
