Hər gün nəqliyyatdan istifadə edən sərnişinlər üçün gündəlik, həftəlik, altı aylıq və illik gediş biletləri təsis olunmalıdır
Bakı metropolitenində aparılacaq yenidənqurma-tikinti işləri deyəsən, gediş haqqının qaldırılacağı məsələsini də gündəmə gətirib. Xocəsən" elektrik deposunda ("Xocəsən" stansiyası) Bakı metropoliteninə gətirilmiş yeni nəsil qatarların yığılaraq komplektləşdirilməsi ilə bağlı təşkil olunan mediatur zamanı Bakı Metropoliteni QSC sədrinin müşaviri Emil Əhmədov isə deyib ki, metroda gedişhaqqı ilə bağlı məsələ daim müzakirə olunur, amma hazırda bu barədə məlumatımız yoxdur. “Bu barədə müzakirələr aparılır, buna baxmaq lazımdır. Bir çox ölkələrdə fərqli yanaşmalar var. Məsələn, aylıq kartlar, bir səfərlik kartlar. Eyni zamanda, tələbələrə və sosial həssas qrupa daxil olan insanlar üçün fərqli yanaşmalar tətbiq olunur". "Bir çox çox ölkələrdə məsafədən asılı olaraq ödənişlər mümkündür. Bunlar daim bizim gündəmimizdədir, müzakirələr olunur. Hələlik yekun qərar yoxdur", - E.Əhmədov deyib.
İqtisadçı Natiq Cəfərli isə hesab edir ki, birdəfəlik gedişhaqqı mənasız mübahisə mövzusudur:
- Yenə ictimai nəqliyyatda gedişhaqqının artacağı ilə bağlı məlumatlar dolaşır – bizim qalstuklu müəllimlərə, hökumətə, bəlkə də, 15 ildir izah edirik ki, nəqliyyatda birdəfəlik gediş haqqının neçəyə olması ancaq turistləri və ya, nadir hallarda ictimai nəqliyyatdan istifadə edən avtomobil sahiblərini maraqlandırmalıdır. Birdəfəlik gedişhaqqı mənasız mübahisə mövzusudur. Hər gün nəqliyyatdan istifadə edən sərnişinlər üçün gündəlik, həftəlik, altı aylıq və illik gediş biletləri təsis olunmalıdır. Bu biletləri alan vətəndaşlar üçün fərqli tariflər müəyyən edilməlidir. Əgər bir günlük bilet alınırsa və gün ərzində istənilən qədər nəqliyyatdan istifadə edilirsə, bunun qiyməti, məsələn, 2 manat ola bilər. Aylıq biletlər, təxminən 30 manat, altı aylıq biletlər 140 manat, illik biletlər isə 220 manat ola bilər. Belə sistem Avropa ölkələrində tətbiq olunur və sərnişinlər üçün həm daha sərfəli, həm rahatdır. Nəqliyyat şirkətlərinə də bu sistem sərfəlidir – hər dəfə ÖNCƏDƏN pul almaqla, öz problemlərini, borc-xərclərini həll edə bilərlər. Bundan başqa şagird, tələbə və təqaüdçülər üçün ad-soyada bağlı kartlar olmalıdır, qiyməti, normal qiymətlərdən, azı, 2 dəfə ucuz olmalıdır, məsələn, tələbə, şagird, təqaüdçü cəmi 100 manat (altı aylıq 55 manat) ödəməklə il ərzində ictimai nəqliyyatdan (metro və avtobus) məhdudiyyətsiz istifadə haqqı qazanmalıdır. İldə 2-3 dəfə səs-küy salıb nəqliyyatda gediş haqqından danışıb, sonra artırırlar, amma bu qiymət artımı keyfiyyəti dəyişmir, müştəri məmnuniyyəti yaratmır.
