Son zamanlar sükanı sağdan sola keçirilmiş avtomobillərin ölkəyə gətirilməsi halları artıb.
Buna səbəb isə orijinalına nisbətən daha ucuz başa gəlməsidir. Amma ekspertlər deyirlər ki, bu cür avtomobillərin qəza və alışıb yanma riski çoxdur.
Xəzər TV məlumat verir ki, ekspertlərin sözlərinə görə, son illərdə qiyməti nisbətən ucuz olan, sükanı sağdan sola keçirilmiş avtomobillərdə belə hallara tez-tez rast gəlinir.
Avtosfer.az saytının baş redaktoru, nəqliyyat eksperti Elməddin Muradlı "Sherg.az”a bildirib ki, bu tipli nəqliyyat vasitələrinin ölkəyə gətirilməsini qadağan etmək lazımdır:
“Hələ ki, bundan başqa çıxış yolu yoxdur. Avtomobil gətirilir və texniki problemlər nəzərdən keçirilmir. İli, ban nömrəsi və şassi nömrəsi uyğundursa, gömrükdən keçir. Ancaq gələcəkdə bu avtomobillərin ölkəyə gətirilməsini məhdudlaşdırmaq lazımdır. Çünki bu ciddi fəsadlar yaradır. Kimsə alaraq ucuz və qənaət aldığını düşünürsə yanılır. Çünki idarə edildikcə çox ciddi ziyan vuraraq qəza riski qaçınılmaz olur. Bu cür avtomobilləri qanunla qadağan edilsə, daha yaxşı olar. Hələ ki, hüquqi mexanizmi yoxdur”.
