Son illər ölkəmizdə nəqliyyat vasitələrinin, xüsusilə də fərdi və operativ çatdırılma sahəsində istifadə olunan moped və motosikletlərin sayı sürətlə artmaqdadır. Bu artım yeni reallıqlar və ehtiyaclar yaratmaqla yanaşı, hüquqi tənzimləmələrə olan zərurəti də gündəmə gətirib. Hərəkət təhlükəsizliyi, ictimai nizam, eləcə də bu nəqliyyat vasitələrindən istifadə edənlərin hüquq və vəzifələrinin aydın şəkildə müəyyən olunması üçün normativ hüquqi çərçivənin təkmilləşdirilməsi zəruri hesab olunur.
Məhz bu məqsədlə Milli Məclisin Hüquq siyasəti və dövlət quruculuğu komitəsinin bu gün keçirilən iclasında "Yol hərəkəti haqqında" qanuna dəyişiklik layihəsi müzakirəyə çıxarılıb. Layihəyə əsasən, 3 ay sonra Azərbaycanda moped idarə etmək üçün sürücülük vəsiqəsi-konkret olaraq A1 kateqoriyalı vəsiqə tələb olunacaq. Bu addım, həm sürücülərin təhlükəsizliyinin artırılması, həm də yol hərəkəti qaydalarının daha səmərəli tətbiqi baxımından mühüm əhəmiyyət daşıyır.
Nəqliyyat eksperti Aslan Əsədov Sherg.az-a açıqlamasında təxminən üç il əvvəl, moped və motosikletlərin istifadəsinin qanunvericiliklə tənzimlənməsi məsələsinin müvafiq dövlət qurumları qarşısında qaldırıldığını söyləyib:
"Qanun qüvvəyə minməzdən əvvəl bu sahədə çalışan şəxslər, xüsusən də kuryerlər, narahatlıqlarını ifadə edərək bildirirdilər ki, moped və motosikletlərə tətbiq olunacaq məhdudiyyətlər onların fəaliyyətinə ciddi maneələr yarada bilər. Bu da həm onların qazanc imkanlarını azaldır, həm də vətəndaşların operativ şəkildə xidmət almasına təsir göstərir".
Ekspert kuryerlərin əməyinin yüksək qiymətləndirilməli olduğunu söyləyib:
"Onlar xüsusilə pandemiya dövründə, yəni koronavirusun geniş yayıldığı zamanda cəmiyyət üçün əhəmiyyətli rol oynadılar. Həmin dövrdə onların fəaliyyəti daha da aktuallaşdı və insanların gündəlik tələbatlarının qarşılanmasında mühüm rol oynadı".
