Azərbaycanda martın 30 və 31-i Ramazan bayramı qeyd olunur.
Azərbaycanda Ramazan bayramı 1993-cü ildən dövlət səviyyəsində qeyd olunur. Qeyd edək ki, bu il Azərbaycanda Ramazan ayı martın 1-də başlayıb.
İlahiyyatçı Ağa Hacıbəyli “Sherg.az”a açıqlamasında bildirdi ki, fitrə zəkatı Ramazan ayının son günü - bayram gününə məxsus olan bir ibadətdir:
“Bayram namazını qılmadan öncə yerinə yetirilməlidir. Əgər çatdırılmırsa, bayramdan sonra da verilə bilər. Amma əsas odur ki, fitrə sədəqəsini vaxtında çatdırmağı din daha uyğun görür. Çünki bayramın sevincini bayram fərəhini cəmiyyətdə hər kəsin yaşamasını Rəbbimiz diləyir və istəyir. Təbii ki, zəngin insanlar fitrə sədəqəsi çıxararlar. Bu əziz günlərdə fəqir insanlarla zəngin insanların arasında önəmli bir körpü qurulur. Peyğəmbərimiz buyurur ki, tutduğumuz oruc səmada asılı vəziyyətdədir. Verdiyiniz sədəqə vasitəsilə oruclarınız Allah qatında məqbul olur. Bu baxımdan maliyyə imkanları yerində olan və zəruri ehtiyacları olan bir adam, yəni təqribən 82 qram qızıldan artıq imkanı olan birisi İslamda zəngin sayılır və bu adam fitrə zəkatı çıxarır. Fitrə zəkatı daha çox yoxsullara, fəqirlərə, imkansız insanlara aiddir. Cəmiyyətdə bu tipli insanların tapılması və sevindirilməsi ilə bayram gerçəkləşdirilir”.
