45 yaşdan aşağı təxminən 17 milyon nəfər isə hələ evlənməyib
İranın Torpaq və Əhali Qeydiyyatı İdarəsinin məlumatına görə, bu ilin son 6 ayında 80 yaşdan yuxarı 738 kişi evlənib.
Sherg.az xəbər verir ki, bu kişilər arasında ən yaşlı bəyin 119 yaşında olduğu qeyd edilib.
İran dövlət televiziyasının xəbərinə əsasən, qurumun sözçüsü Əzam Kavidil bildirib ki, həmin dövrdə 80 yaşdan yuxarı 17 qadın evlənib və onların ən yaşlısı 93 yaşındadır.
İranın Gənclər və İdman nazirinin müavini Əli Rıza Rəhiminin 1 sentyabrda verdiyi açıqlamaya görə, 45 yaşdan aşağı təxminən 17 milyon nəfər hələ evlənməyib.
Rəhimi dövlət televiziyasına açıqlamasında bildirib:
“45 yaşdan yuxarı kişilərin 14 faizi, qadınların isə 4 faizi heç vaxt evlənməyib. Bu vəziyyət daimi subaylıq meylinin artdığını göstərir. 45 yaşdan aşağı kişilər arasında 9,5 milyon, qadınlar arasında isə 7,5 milyon subay var.”
Rəhimi əlavə edib ki, “evliliyi təşviq edən fəaliyyətlər” çərçivəsində ölkə üzrə 1.500 evlilik məsləhət mərkəzinə lisenziya verilib və ötən il nikah öncəsi 9.800 seminar təşkil olunub.
4 ƏSAS SƏBƏB
Bəzi iranlı mütəxəssislərin fikrincə, ölkədə evliliklərin azalmasının başlıca səbəbləri bunlardır:
iqtisadi çətinliklər,
özünə inam çatışmazlığı,
qadınlar arasında feminist yanaşmaların artması,
kişilərdə məsuliyyətdən qaçma meyli.
Rəsmi statistikaya görə, İranın əhalisi 2024-cü il məlumatlarına əsasən təxminən 90 milyondur.
