Eyyub Hüseynov: İstehlakçıların hüquqları haqqında qanun yenilənməli və bu kimi hallar qanunvericilikdə nəzərə alınmalıdır
Bakıda səhər saatlarında idman məşğələsi çərçivəsində qaçış həyata keçirən “Run Club” iştirakçıları qısa fasilə zamanı kofe qəbul etmək məqsədilə paytaxt ərazisində yerləşən kofe mağazalarından birinə müraciət ediblər.
Lakin ödəniş müqabilində içki almaq istədikdə, satıcılar tərəfindən onlara “Run Club” üzvlərinə kofe satılmasının mümkün olmadığı bildirilib.
Azad İstehlakçılar Birliyinin rəhbəri Eyyub Hüseynov "Sherg.az"a bildirib ki, Azərbaycanda sahibkarlıq üçün son dərəcə rahat şərait yaradılıb:
“Əslində, hökumət sahibkarların üstün mövqeyini formalaşdırıb. Bəzi hallarda isə, hətta müasir supermarketlərdə alıcılar mağazaya daxil olduqda onlara potensial hüquq pozucusu kimi yanaşılır, çantaları yoxlanılır, saxlanılır və belə bir mühit yaradılmışdır ki, biznes qurumları alıcılarla istədikləri kimi rəftar edə bilirlər. Bu kimi şikayətlər daxil olduqda məsələ dövlət orqanları qarşısında qaldırılır. Lakin cavab olaraq bildirilir ki, sahibkarlar öz ərazilərində istədikləri qaydada davranmaq hüququna malikdirlər və qanunvericilikdə istehlakçıya mal satmaqdan imtina etdiklərinə görə hər hansı məsuliyyət nəzərdə tutulmayıb. Buna görə də, təəssüf ki, Azərbaycanda bu vəziyyət mövcuddur və bu hal üzrə konkret olaraq heç kəsi günahlandırmaq mümkün deyil. Məsələn, bəzi restoranlarda müştəriyə “üzün xoşuma gəlmir” və ya “tək gəlmisən, içəri buraxmırıq” kimi əsaslarla xidmət göstərilməsindən imtina edildiyi hallar mövcuddur. Bu isə Azad İstehlakçılar Birliyinin arzu etdiyi vəziyyət deyil. Bu səbəbdən mütləq şəkildə istehlakçıların hüquqları haqqında qanun yenilənməli və bu kimi hallar qanunvericilikdə nəzərə alınmalıdır”.
