Qəyyumu tərəfindən zorakılığa məruz qalmış uşaq barəsində Dövlət Komitəsi tərəfindən dərhal aidiyyəti qurumlarla əlaqə saxlanılıb.
Bunu Teleqraf-a açıqlamasında Ailə, Qadın və Uşaq Problemləri üzrə Dövlət Komitəsinin Uşaq məsələləri şöbəsinin böyük məsləhətçisi Şəbnəm Cəfərova deyib.
O bildirib ki, hadisə ilə bağlı dərhal Sabunçu Rayon İcra Hakimiyyəti yanında Uşaq hüquqlarının müdafiəsi üzrə komissiya və Sabunçu Rayon Polis İdarəsi tərəfindən ailəyə səfər həyata keçirilib.
"Yeniyetmə uşağa qarşı zorakılıq törətməkdə şübhəli bilinən qəyyumu ilə bağlı Sabunçu Rayon Polis İdarəsinin 13-cü Polis bölməsində təhqiqat araşdırması aparılır. Bundan əlavə, yetkinlik yaşına çatmayanın hansı dərəcədə bu prosesdə xəsarət almasının dəyərləndirilməsi məqsədilə ekspertiza təyin edilib", - Ş.Cəfərova əlavə edib.
Ətraflı
O həmçinin qeyd edib ki, uşağın vəziyyəti ilə əlaqədar Sosial Xidmətlər Agentliyi tərəfindən tibb müəssisələrindən birinə yerləşdirilib. Qəyyum şəxs barəsində isə qanuna müvafiq olaraq araşdırma işinə başlanılıb:
"Daha sonra qəyyumluğun ləğvi və uşağın sığınacağa yerləşdirilməsi ilə bağlı Sabunçu Rayon İcra Hakimiyyəti və Sosial Xidmətlər Agentliyi tərəfindən iş həyata keçiriləcək".
