Bakıda yağan leysan yağışları taksi xidmətlərinin qiymətinin artmasına səbəb olub.
Teleqraf xəbər verir ki, adi günlərdə 8-10 manata gedilən məsafələrin gedişhaqqı hazırda 25-30 manat arasında dəyişir.
Paytaxtın bəzi ərazilərinə taksi ilə getmək istəyən sərnişinlər 40-45 manat ödəməlidirlər. Adi günlərdə həmin məsafələrin qiyməti 14-17 manat təşkil edirdi.
Bunlar adi - ekonom taksi xidmətinin qiymətidir. Komfort taksilərdə isə Bakının müxtəlif istiqamətləri üzrə qiymətlər 60 manatadək artıb.
Bundan başqa, Bakıda taksi tapmaq da çətinləşib. Taksi sifariş edən sərnişinlər avtomobilin gəlməsi üçün 20-25 dəqiqə gözləməli olurlar.
Avtosfer.az saytının baş redaktoru, nəqliyyat eksperti Elməddin Muradlı "Sherg.az”a bildirib ki, qanunda bununla bağlı heç bir izahat işi yoxdur:
“Yeni qaydalara əsasən taksidə yalnız qiymətin aşağı həddi müəyyənləşib. Yəni 2 manat 50 qəpikdən aşağı qiymət ola bilməz. Yuxarı həddi isə açıq qalıb. Hətta yuxarı hədd qiymətini isə taksi şirkətlərinin və sürücülərin vicdanına buraxıblar ki, bu məsələni mövcud qaydalar, şərtlər çərçivəsində tənzimləsinlər və həll etsinlər. Bu zaman isə qarlı, yağışlı havalarda sui istifadə halları görünür. Çox təəssüf burada da qanunla hər hansı bir addım atmaq imkanı yoxdur. Çünki məsələqanunda əksini tapmayıb. Bunların izahı qanunda olsa, o zaman belə hallarda baş verməzdi”.
