Bunlar hamısı təsadüfi adamların kosmetologiya ilə məşğul olmasından irəli gəlir
ABŞ-ın Tenessi ştatının Noksvill şəhər sakini Ceyn Şarp manikür salonunda ölümcül infeksiyaya yaxalanıb.
Qadın deyib ki, manikür zamanı usta onun barmağını zədələyib, amma o, buna əhəmiyyət verməyib. Ancaq bir neçə saatdan sonra barmağı şişməyə başlayıb və səhər şiş artıq dirsəyə qədər yayılıb.
Qadın xəstəxanaya gedib və ona nekrotik yara diaqnozu qoyulub. Bu, olduqca sürətlə dərinin üst qatına və dərialtı toxumaya yayılan çox nadir bakterial infeksiyadır.
Həkimlərin dediyinə görə, qadın həkimə gec müraciət etsəydi, bütün qolunu itirə bilərdi.
O, manikür salonunu məhkəməyə verib.
Gözəllik, masaj salonlarının, stomotoloji kabinetlərin infeksiya mənbəyi olması sirr deyil. Gözəllik salonuna gedəndə individual əl-üz dəsmalı aparanları az görməmişik. Səbəb də bunu göstəriblər ki, oradakı dəsmalların rəngindən adam iyrənir. Bilmirsən kim yuyur, harda, necə yuyulur. İstər qadın gözəllik salonlarında, istərsə də kişi salonlarında baş dərisinə yara düşən, saçı yanan müştərilər az olmayıb. Tər-təmiz saçlara kəpək salan gözəllik salonları da olur. Bunlar müalicəsi mümkün hallardır. Vay o gündən ki, insan ağır infeksiyalara yoluxsun. Son zamanlar stomotoloji kabinetlər pasiyentlə işə başlamamış hepatitlə bağlı tibbi arayış tələb edirlər ki, sonradan pasiyent hepatitə yoluxmasına görə diş həkimini günahlandırmasın. Nə qədər ehtiyatlıyıq gözəllik salonlarına qarşı?
“Vətəndaş” İctimai Birliyinin sədri Günel Səfərova “Şərq”ə açıqlamasında bildirdi ki, xidmət sektoru ilə bağlı ciddi iş aparılmasına ehtiyac var:
- Birliyimizə gözəllik salonları, estetik həkimlərlə bağlı şikayətlər daxil olur. Vətəndaşlar məhkəməyə müraciət etmək istədiklərini bildirirlər. Amma problem bundadır ki, gözəllik salonları və yaxud, hansısa başqa xidmət sektoru ilə bağlı məhkəməyə müraciət etmək üçün hüquqi əsas tapılmır. Ona görə ki, salonların çoxu lisenziyasız fəaliyyət göstərir, vergi ödəyicisi deyillər, müştərinin qeydiyyatı aparılmır. Yaşayış binalarının alt mərtəbələrində gözəllik salonları fəaliyyət göstərir. Salonlarda çalışanların əksəriyyəti 3 aylıq kurs keçmiş adamlardır. Ya da yanında işləyən saç ustasına, manikür, pedikür ustasına baxıb öyrənən.
Əksəriyyətinin diplomu yoxdur. Peşə məktəbi bitirməyiblər. Baxırsan ki, gəzəllik salonlarının divarları sertifikatlarla, diplomlarla bəzədilib. Kim, hansı təşkilat verib bu sertifikatları, diplomları? Bilinmir. Heç kim də bununla maraqlanmır. Siz neçə nəfəri nümunə göstərə bilərsiniz ki, saç ustasından ixtisasının olub-olmadığını soruşsun, ustadan harada təhsil aldığını soruşsun. Eşidirlər ki, yaxşı ustadır, gedirlər yanına. Və şəkil göstərib deyirlər ki, istəyirəm saçım bu cür olsun və ya hansısa estetik əməliyyat etdirmək istəyirlər. Amma həkimlə məsləhətləşmirlər ki, bunu eləmək olar, olmaz? Ona görə də sonradan bir çox fəsadlar yaranır. Ümumilikdə götürsək, biz savadsız istehlakçıyıq. Marketdə aldığımız malın, məhsulun saxlanma müddətinə diqqət etmirik, alıb gətiririk evə, sonra da qida zəhərlənməsi baş verir. İstehlakçıların maarifləndirilməsi də zəifdir.
Problem bundadır ki, gözəllik salonları və yaxud, hansısa başqa xidmət sektoru ilə bağlı məhkəməyə müraciət etmək üçün hüquqi əsas tapılmır
G.Səfərova qeyd etdi ki, gözəllik salonlarında çalışanlar, kosmetoloqlar ixtisaslı olmalıdırlar:
- Kosmetoloji prosedur həyata keçirənlər bilməlidir ki, vətəndaşın nəyə allergiyası var. Bəzən adicə saç boyası insanda allergik reaksiya verir. Bizə müraciət edən xanımlar olur və şikayət edirlər ki, kosmetoloq qəbuluna gedib üzdə müəyyən əməliyyat etdiriblər, kosmetoloq deyib, üzün şişkinliyi bir neçə günə keçəcək, amma 1 aydır keçmir. Bəzən üzü bərbad hala düşən xanımlar da olur. Bunlar hamısı təsadüfi adamların kosmetologiya ilə məşğul olmasından irəli gəlir. Amma xidmət sektorunda nəzarətsizlik olduğundan onlarla hüquqi çərçivədə mübarizə aparmaq, istehlakçının hüquqlarını müdafiə etmək mümkün olmur.
