Böyük Britaniyada yerləşən bir səyahət şirkətinin apardığı araşdırmaya əsasən, gənc yetkinlərin ən böyük arzusu artıq evlənmək və ya ev sahibi olmaq deyil, uzun səyahətlərə çıxmaqdır.
Sherg.az xəbər verir ki, "The Mirror" nəşrində yer alan araşdırmada, Z və Y nəsillərinin 30 yaşına çatmamışdan əvvəlki ən böyük istəyinin uzun bir səyahətə çıxmaq olduğu bildirilir. Ənənəvi həyat hədəfləri arxa planda qalarkən, iştirakçıların 27%-i 30 yaşa çatmaqdan qorxduğunu bildirib. 31%-i isə kifayət qədər həyəcanverici təcrübələr yaşaya bilmədiyinə görə məyus olduğunu qeyd edib.
25-29 yaş aralığında olan gənclərlə aparılan təhlil, bu yaş qrupunun gündəlik həyatdan uzaqlaşıb böyük bir səyahətə çıxmaq istədiyini göstərir. İştirakçıların demək olar ki, yarısı 30 yaşa çatmazdan əvvəl böyük bir səyahətə çıxmağı qarşısına məqsəd qoyub.
Dünyanı gəzmək, bu yaş qrupundakı insanlar üçün artıq ev almaq və ya evlənməkdən daha önəmli hesab olunur. Araşdırmada iştirak edənlərin 58%-i bu günə qədər yalnız beş və ya daha az ölkə gördüyünü bildirib.
Bu nəsillərin arzularını əsasən ekzotik mədəniyyətləri tanımaq, təbiət möcüzələrini yaxından görmək və Tayland, Barbados, Meksika kimi yerlərə səyahət etmək bəzəyir.
Lakin iştirakçıların 53%-i yüksək xərclərin bu cür səyahətləri planlaşdırmaqda çəkindirici rol oynadığını qeyd edir.
