“Vəziyyəti tam başa düşmək üçün qeyd etməliyəm ki, 2024-cü ilin büdcəsi ilə müqayisədə 2025-ci ildə müdafiə xərcləri kəskin şəkildə artıb. Bu, müəyyən təxirəsalınmaz ehtiyaclarla bağlı idi”.
Teleqraf xəbər verir ki, bunu Ermənistan Baş naziri Nikol Paşinyan 2026-cı ilin büdcəsində müdafiə xərclərinin niyə artırılmayacağını şərh edərkən bildirib.
Baş nazirin sözlərinə görə, 2025-ci ildə 2024-cü illə müqayisədə müdafiə xərclərinin qeyri-mütənasib artımı qeydə alınıb və onun bir hissəsi gələcək borcların və öhdəliklərin ödənilməsinə yönəldilib: “Müdafiəyə yönəldilən və gələcək borcun azaldılması üçün 2030 və ya 2035-ci ildə ödəməli olduğumuz kreditləri ödəməyi əlverişli hesab etdik”.
Paşinyan qeyd edib ki, 2025-ci ildə 115 milyard dramlıq kəskin, qeyri-mütənasib artım olmasaydı, təbii artım olacaqdı:
“2025-ci ilə nisbətən 2026-cı ildə müdafiə xərclərini artırmağı deyil, əksinə azaltmağı planlaşdırmağımız ilk növbədə bununla bağlıdır”.
