Qrononun müzakirələri Ankarada keçirməsi onun Türkiyəni Yaxın Şərqdə və Azərbaycan-Ermənistan münasibətlərində önəmli aktor, aparıcı qüvvələrdən biri kimi gördüyünü göstərir
Avropa İttifaqının (Aİ) Cənubi Qafqaz və Gürcüstan böhranı üzrə xüsusi nümayəndəsi Maqdalena Qrono Ankarada Cənubi Qafqazla bağlı müzakirələr aparıb.
O, bu barədə sosial media hesabında bildirib.
Maqdalena Qrono Ankaraya səfərini müsbət qiymətləndirib.
“Ankara səfərini müsbət yekunlaşdırdıq. Cənubi Qafqaz və regional mövzular, o cümlədən Azərbaycan-Ermənistan münasibətlərinin normallaşması, Gürcüstandakı münaqişə ilə bağlı problemlər və Türkiyə-Ermənistanın normallaşması ilə bağlı açıq və konstruktiv mübadilələrə görə Türkiyədəki həmkarlarına minnətdaram”, - diplomat vurğulayıb.
O bildirib ki, səfər çərçivəsində həmçinin Cənubi Qafqaz ölkələri, Türkiyə, Mərkəzi Asiya və Aİ-yə fayda verə biləcək əlaqə və regional əməkdaşlıq imkanları müzakirə edilib: “Artan qlobal çağırışlar kontekstində regional sabitliyə, təhlükəsizliyə və davamlı sülhə doğru irəliləyiş üçün səyləri ikiqat artırmaq vacibdir”.
Politoloq Samir Hümbətov "Sherg.az"a bildirib ki, Avropa İttifaqının (Aİ) Cənubi Qafqaz regionuna özünəməxsus baxışı var:
"Aİ istəsə, Ermənistan-Azərbaycan münasibətlərinə təsir edə biləcək bir qurumdur. Ən azından, Ermənistana "Bu məsələdə yanlışsan, çalış düzəlt" deyə biləcək potensiala malikdir. Azərbaycanın mövqeyi aydındır: sülh danışıqlarında uğurlu nəticə əldə edilməlidir. Çünki bunun alternativi artıq müharibə sayılır. Digər tərəfdən, Aİ-nin "mülki missiya" adı altında hərbçilərini Ermənistana göndərərək sərhəddə yerləşdirməsi sülh danışıqları prosesində suallar doğurur. Eyni zamanda, Maqdalena Qrononun müzakirələri Ankarada keçirməsi onun Türkiyəni Yaxın Şərqdə və Azərbaycan-Ermənistan münasibətlərində önəmli aktor, aparıcı qüvvələrdən biri kimi gördüyünü göstərir. Bu, müsbət haldır və indiyə qədər atılan addımların müəyyən nəticə verdiyini sübut edir".
