Avropa Komissiyası Gürcüstan hökumətinin addımlarını diqqətlə izləyir və lazım gələrsə, vizasız rejimin dayandırılması mexanizminin işə salınmasına dair qərar qəbul edə bilər.
Teleqraf-ın yerli bürosu xəbər verir ki, bu barədə Avropa Komissiyasının nümayəndəsi Ukraynanın “Avropa həqiqəti” («Европейская правда») nəşrinə bildirib.
Qeyd olunub ki, Brüseel hələ də Gürcüstan hakimiyyətinin Avropa Komissiyasının bütün tövsiyələrində yer almış məsələlərin həlli üzrə konkret addımlar atacağını gözləyir.
“Ötən həftə Gürcüstan hakimiyyəti müstəqil vətəndaş cəmiyyəti təşkilatlarının bank hesablarını dondurmaqla ölkədə demokratiyaya qarşı daha bir addım atıb. Avropa İttifaqı bu qərarı dərhal ləğv etməyi çağırır”, - nümayəndə söyləyib.
Qeyd edək ki, Gürcüstan Avropa Komissiyasının tövsiyələrinin yerinə yetirilməsinə dair hesabatı avqustun 31-də təqdim edib. Komissiyanın Gürcüstanın cavabından narazı qaldığı bildirilir.
Xatırladaq ki, Avropa İttifaqı (Aİ) və Gürcüstan arasında vizasız gediş-gəliş rejimi 2017-ci ilin martından qüvvədədir. Rejimin dayandırılması prosesini Aİ-nin 27 üzv dövlətindən biri və ya Avropa Komissiyası başlaya bilər.
