Ermənistanın Baş naziri Nikol Paşinyan qarşıdakı parlament seçkilərinə “Sülh” şüarı ilə gedəcək.
Bu barədə “Hraparak” qəzeti məlumat yayıb.
“Nikol Paşinyan başda olmaqla, hakim “Vətəndaş Müqaviləsi” Partiyası uzun müddətdir seçkiqabağı şüar axtarır. Dünənki müraciəti ilə Paşinyan mahiyyət etibarı ilə seçkiqabağı təşviqat kampaniyasına start verdi və “sülh” sözünün işlədiləcəyi şüarını açıqladı. Paşinyan özünü və komandasını sülhməramlılar kimi təqdim etməyə çalışacaq”, - erməni nəşri bildirib.
Qəzet Ermənistan baş nazirindən belə bir sitat da gətirib:
“Hətta bizim şəhidlərimizi ehtiramla yad etmək, onları müqəddəs tutmaq, onların xatirəsini yaşatmaq üsulumuz damla-damla, millimetr-millimetr dəyişməlidir, sülh övladlarını itirmiş valideynlərə təsəlli verməlidir”.
Siyasi şərhçi Azər Həsrət Sherg.az-a deyib ki, Ermənistan cəmiyyətinin böyük əksəriyyəti əslində Azərbaycan və qardaş Türkiyə ilə normal münasibətlərin tərəfdarıdır:
"Sadəcə olaraq, onlar uzun illər Sarkisyan və Köçəryan cütlüyünün girovu idilər. Hakimiyyətdə bir-birini əvəz edən bu iki şəxs erməni cəmiyyətini faktiki olaraq əsarətdə saxlayırdı. Bu prosesdə onlara birbaşa dəstək verən isə Rusiya idi. Beləliklə, erməni xalqı Rusiyanın və onun Ermənistandakı dayaqları olan Sarkisyan və Köçəryanın girovuna çevrilmiş, Azərbaycanla münaqişəyə və müharibəyə cəlb edilmişdi. Bu müharibə isə erməniləri çox yormuşdu. Qarabağ ermənilərin zəif çiyinlərinin daşıya biləcəyi yük deyil. Qarabağ yükü onların gücü üçün olduqca ağırdır. Əgər Ermənistan bundan azad olsa, inkişaf yoluna qədəm qoya bilər".
Analitikin fikrincə, Paşinyan da bu reallıqları anlayan bir baş nazirdir:
"Ona görə də Azərbaycan və Türkiyə ilə dil tapıb ortaq məxrəcə gəlməyə çalışır ki, ölkəsini və xalqını xilas etsin. O, sülh şüarı altında seçkilərə getsə, öz uğurunu təmin edə biləcək.
Ermənistan xalqı artıq yaxşı anlayır ki, bundan sonrakı mərhələdə Azərbaycan və Türkiyə ilə qarşıdurmaya tab gətirməyəcək. Sadəcə olaraq, Moskvadan idarə olunan kiçik bir revanşist qrup var. Onlar bundan sonra da sülhə qarşı çıxmağa çalışacaqlar. Lakin sevindirici məqam odur ki, bu revanşistlərin sayı olduqca azdır".
