Ölkənin siyasi elitası bu təhlükəni düzgün qiymətləndirərək mümkün təxribatlardan uzaq durmağı bacardı
“Bidzina İvanişvili oktyabrın 4-də keçirilən seçkilər zamanı baş verənlərlə bağlı qəzəblidir”. Bunu Gürcüstanın keçmiş Prezideni Mixeil Saakaşvili deyib.
Keçmiş prezident bildirib ki, İvanişvili və peykləri 4 oktyabrla bağlı qəzəblidir, çünki xalq “seçkilər”in boykot olunmasını bacardı: “Əlbəttə, “Qızılgül” inqilabını kopyalamaq səhv hesab idi - generalların əvvəlki müharibənin ssenarisi ilə döyüşməsi düzgün deyil. “Qızılgül” inqilabı illərlə dəqiq şəkildə hazırlanmışdı.
Mən o inqilabın təşkilatçısı kimi bildirirəm ki, olduğu kimi kopyalamaq alınmayacaq. Çox şey spontan şəkildə baş verəcək, amma həmin spontanlığın da hazırlıq tələb etdiyini unutmaq olmaz”.
Mixeil Saakaşvili əlavə edib ki, oktyabrın 4-də Tbilisidə başlayan aksiyalara ən mübariz gənclər qatılıb və bu insanlar cəsarətlərinə görə təşəkkürə layiqdirlər.
Gürcüstanın keçmiş lideri baş verənləri tamamlamaq və məqsədə nail olmaq üçün vətəndaşları sosial mediada fəal olmağa çağırıb: “İndi bütün bunlar dərhal həll olunmalıdır, çünki çox vaxtımız yoxdur. Gürcü xalqı qalib gələcək”.
Sosial Tədqiqatlar Mərkəzinin sektor müdiri İlyas Hüseynov Sherg.az-a açıqlamasında bildirib ki, Gürcüstanda baş verən son hadisələr region və beynəlxalq ictimaiyyətin diqqət mərkəzinə çevrilib. Politoloqun sözlərinə görə, seçkilərdən sonra nəticələrdən narazı qalan seçici qrupları ilə polis arasında baş verən toqquşmalar ölkədəki sosial-siyasi gərginliyin hələ də tam aradan qalxmadığını göstərir:
“Bu, həm də onu sübut edir ki, hakimiyyət nə qədər güclü olsa, struktur baxımından təkmilləşsə və öz dayaqlarını genişləndirsə də, siyasi proseslərdən narazı olan qüvvələrin sayı az deyil.
Həmin qüvvələrin bir qismi daxili amillərlə yanaşı, xarici geosiyasi mərkəzlərin təsiri altında fəaliyyət göstərir. Gürcüstanın sabiq Prezidenti Mixeil Saakaşvili ölkənin siyasi tarixində mühüm rol oynamış, bir sıra islahatlara imza atmış şəxsiyyət kimi dəyərləndirilir. Onun bəzi fikirlərində reallıqla səsləşən məqamlar mövcuddur. Həqiqətən də, Saakaşvilinin rəhbərlik etdiyi dövrdə baş vermiş “Qızılgül inqilabı”nı bu gün eyni şəkildə təkrarlamaq mümkün deyil. Çünki indiki dövrdə siyasi vəziyyət, geosiyasi balans və cəmiyyətin düşüncə tərzi tamamilə fərqlidir.
Ümumiyyətlə, bir dövrdə uğur gətirən siyasi model və ya strategiyanı başqa bir zaman kəsiyində tətbiq etmək, eyni nəticəni gözləmək məntiqsiz olardı. Zaman dəyişdikcə ictimai baxışlar, prioritetlər və siyasi konfiqurasiya da transformasiyaya uğrayır. Buna görə də Gürcüstan bu gün fərqli bir mərhələyə qədəm qoymalıdır. Ölkədə yeni siyasi səhifənin açılması, ictimai maraqların qorunması və milli təhlükəsizliklə bağlı qərarların praqmatik şəkildə verilməsi vacibdir”.
İlyas Hüseynov qeyd edib ki, hazırkı hakimiyyətin davranışı əsasən əhalinin sosial rifahının yaxşılaşdırılması və milli maraqların qorunması istiqamətindədir. Eyni zamanda Gürcüstan rəhbərliyi geosiyasi reallıqları da nəzərə alaraq ehtiyatlı və rasional siyasət yürüdür:
“Rusiya-Ukrayna müharibəsi fonunda Gürcüstan ərazisində yeni cəbhə açmaq cəhdləri olsa da, ölkənin siyasi elitası bu təhlükəni düzgün qiymətləndirərək mümkün təxribatlardan uzaq durmağı bacardı.
Bu gün Gürcüstana qarşı Brüsseldən müxtəlif təzyiqlər və təhdidlər müşahidə olunur. Ayrı-ayrı beynəlxalq güc mərkəzləri regionda öz maraqlarını təmin etməyə çalışır. Lakin Gürcüstanın milli maraqlarını qorumaq, daxili sabitliyi saxlamaq və balanslaşdırılmış xarici siyasət yürütmək ölkə üçün prioritet olaraq qalmalıdır. Bu, həm Gürcüstanın gələcək inkişafı, həm də Cənubi Qafqazda sabitliyin qorunması baxımından mühüm əhəmiyyət daşıyır”.
Şəymən Bayramova
