Ermənistanın Yüksək Texnologiyalar Sənayesi Nazirliyinin binası qarşısında Rusiya telekanallarının ictimai multipleks və kabel şəbəkələrindən çıxarılması tələbi ilə etiraz aksiyası keçirilib. "Respublika naminə" Partiyasının sədri Arman Babacanyan deyib ki, Ermənistan qanunvericiliyi bunu Rusiya telekanalları ilə bağlı da təmin etməyə imkan verir. O vurğulayıb ki, bu telekanallar Ermənistanı hibrid müharibənin tərkib hissəsi adlandıraraq təhqir edir. Onun sözlərinə görə, Rusiyanın siyasəti Ermənistanın dövlətçiliyini aradan qaldırmağa yönəlib. Partiyanın sədr müavini Ruben Mehrabyan isə “Sputnik Ermənistan”ın fəaliyyətini qadağan etməyə çağırıb. Helsinki Vətəndaş Assambleyasının Vanadzor ofisinin rəhbəri Artur Sakunts da Ermənistanda Rusiya telekanallarının yayımının dayandırılmasının tərəfdarı olduğunu bildirib. Onun sözlərinə görə, bu telekanallar tərəfindən yayılan məzmun Ermənistanın təhlükəsizliyinə təhdid yaradır. Aksiya iştirakçıları əllərində “Rusiyanın düşmənçilik dilinə yox”, “Rusiya təbliğatına yox”, “Rus zəhərinə yox” yazıları olan plakatlar tutublar.
Siyasi şərhçi Bəybala Mirzəyev Sherg.az-a deyib ki, ermənilər gec də olsa dərk etməyə başlayırlar ki, Rusiya Cənubi Qafqazda sülhün və tərəqqinin qarşısını alan bir nömrəli toksik ölkədir:
"Lakin bununla yanaşı, Rusiyanın təlimatı üzrə fəaliyyət göstərən radikal erməni müxalifəti isə kilsə ilə birləşərək Paşinyan iqtidarına qarşı mübarizəni davam etdirir. Və bu mübarizədə Rusiya mediası da Paşinyanın əleyhdarlarına ciddi dəstək verir. Ümid edək ki, Paşinyan özündə güc tapıb Rusiya mətbuatının Cənubi Qafqazdan qovulması üçün kəsərli addımlar atmağı bacaracaq. Putin isə elə bu köhnə televizorlar kimi günün birində tarixin tozlu arxivinə köçəcək".
