Qonşu dövlətlərlə normal münasibətlərə böyük əhəmiyyət verir və regionda açıq sərhədli və tərəfdaşlığa əsaslanan münasibətlər qurmağa çalışırıq. Bunu Ermənistan parlamentinin spikeri Alen Simonyan İrəvanda keçirilən Ermənistan-Avropa Birliyi Parlament Tərəfdaşlığı Komitəsinin dördüncü iclasının açılışındakı çıxışında deyib.
Simonyan bildirib ki, Ermənistan hökuməti regionumuzun nəqliyyat və kommunikasiya marşrutlarını ölkələrin suverenliyi, bərabərliyi, ərazi bütövlüyü və qarşılıqlı münasibətlər prinsipləri əsasında daha səmərəli etmək üçün “Sülh qovşağı” layihəsini irəli sürüb. Regiondakı ölkələr və güc mərkəzləri ilə təhlükəsizlik, iqtisadiyyat, enerji və digər sektorlar arasındakı fərqə əsaslanaraq balanslaşdırılmış siyasət aparmağa çalışırıq.
Politoloq Zeynal Əmrəliyev “Sherg.az”a vurğulayıb ki, Ermənistan bu günə kommunikasiyanın açılması barədə fikirlər səsləndirməsinə baxmayaraq bununla bağlı real addımlar atmayıb:
“Azərbaycan Ermənistanın sözügedən məsələylə bağlı real addımlarının şahidi olmayıb. Ermənistan parlamentinin spikeri Alen Simonyandan əvvəl də erməni rəsmilər tərəfindən bu məsələylə bağlı müxtəlif müsbət açıqlamalarının şahidi olmuşuq. Regional kommunikasiyaların açılması daha çox Ermənistanın özünə sərf edir. Nikol Paşinyan höküməti bununla bağlı siyasi iradə göstərmir. Paşinyan höküməti faktiki olaraq erməni kilsəsi, diasporu və Ermənistanın ən böyük havadarları olan Fransa, Hindistandan ehtiyac edərək Azərbaycanla kommunikasiyaların açılmasına siyasi iradə göstərə bilmir. Zəngəzur dəhlizinin açılmasıyla bağlı Ermənistan üçtərəfli bəyanatda üzərinə öhdəlik götürüb və onu yerinə yetirməlidir. Zəngəzur dəhlizi kommunikasiya sahəsində xüsusi əhəmiyyətə malikdir. Ermənistan özünü sülhpərvər göstərməyə cəhd göstərsə də, reallıqda tamamilə bundan uzaqdır. Simonyan və onun kimi parlament təmsilçilərinin belə açıqlamarının reallığı əks etdirmədiyinin şahidi oluruq”.
