“Çox bədbəxt insanlarsınız – sülhün bərqərar olmasına sevinə bilməyən bədbəxtlər”.
Teleqraf xəbər verir ki, bunu Ermənistanın hakim “Vətəndaş Müqaviləsi” partiyasından olan deputat Vaaqn Aleksanyan parlamentdə müxalifətə müraciətində deyib.
“Əminəm ki, siz sərhəddə qurbanların olmamasına həqiqətən də sevinmirsiniz. Azərbaycanla eskalasiya olanda sizin gözlərinizdəki parıltını xatırlayıram. Amma yenə də sizi kədərləndirməliyəm: bu vəziyyətə (sülhün bərqərar olmasına) görə bədbəxt qalmaqda davam edəcəksiniz, çox bədbəxt olacaqsınız”, - deputat qeyd edib.
Aleksanyan Ermənistan müxalifətini “sovetdənqalma” adlandırıb:
“Qərarları özünüz verə bilmirdiniz, sizin yerinizə sovet imperiyası qərar verirdi. Vətəninizin sərhədinin necə olduğuna qərar verə bilmirdiniz, çünki qərar vermək sizlik deyildi. Bu bir yana, indi də real vətəninizdən - həqiqi dövlətinizdən danışmağa belə qadir deyilsiniz. Bu dövlət sizin deyil, sizin bu dövlətlə işiniz yoxdur”.
