Ermənistan ATƏT-in Minsk qrupunun ləğvi ilə bağlı qrupun həmsədrləri Rusiya, ABŞ və Fransa ilə müzakirələrə başlamaq niyyətindədir. Bunu Ermənistanın baş naziri Nikol Paşinyan İctimai Televiziyaya müsahibəsində deyib: "Biz müzakirə oluna bilən və müzakirəyə çıxarılmayan məsələlərin olduğunu danışmışdıq. Müzakirə edilə bilən məsələlərdən biri ATƏT-in Minsk qrupunun buraxılması məsələsidir. Bir daha təkrar edirəm: ATƏT-in Minsk qrupunun buraxılması məsələsi müzakirə oluna bilər və biz yaxın zamanda bu məsələ ilə bağlı müzakirələrin başlanması təşəbbüsü ilə çıxış etməyi planlaşdırırıq".
Siyasi və Hüquqi Araşdırmalar Mərkəzinin (SHAM) sədri, politoloq Xəyal Bəşirov "Sherg.az"a söyləyib ki, keçmiş ATƏT-in Minsk qrupu de-fakto mövcud deyil və heç bir funksionallığı yoxdur:
“Münaqişədən əvvəlki dövrdə belə onun funksionallığı tamamilə bitmişdi. Sadəcə olaraq nəticəsiz səfərlər, görüşlər və populist bəyanatları ilə yadda qalmışdı. Keçmiş Qarabağ münaqişəsinin həlli üçün yaradılan Minsk qrupunun hazırda mövcudluğuna artıq heç bir zərurət qalmayıb. Çünki münaqişə öz həllini tapıb və Azərbaycan qalib tərəf olaraq işğala son qoyulduğunu bildirir. Azərbaycan öz ərazi bütövlüyünü və suverenliyini bərpa edib. Münaqişə geridə qalıbsa, onunla bağlı bütün məsələlər arxada qalmalıdır. Belə olan halda keçmiş Qarabağ savaşının simvoluna çevrilən ATƏT-in Minsk qrupu da ləğv olunmalıdır. Amma Ermənistan hələ də prosesi uzatmağa çalışır və bununla bağlı danışıqlara gəlmir. Fransa ATƏT-in Minsk qrupunun buraxılmasından yana olmayacaq. Fransanı Cənubi Qafqazla bağlayan ATƏT-in Minsk qrupudur. ATƏT-in Minsk qrupunun Fransa, Amerika və Rusiya ilə müzakirəsi zamanı onların mövqeyi bəlli oldu. Ermənistan xatırlayırsa, Rusiyanın ATƏT-in Minsk qrupunun nümayəndəsi və xarici işlər naziri təşkilatın faktiki olaraq mövcud olmadığını və tarixə qovuşduğunu bildirmişdi. Amerikadan olan nümayəndə də müəyyən fikirlər söyləmişdi. Fransa isə heç bir mövqe sərgiləmədi. Ermənistan ona görə müzakirələri istəyir ki, danışıqlar zamanı Fransa əks-mövqe ortaya qoyacaq. Yəni əsas məqsəd ATƏT-in Minsk qrupunun buraxılmamasına nail olmaqdır. Halbuki Ermənistan tərəfinin bu mövqeyi ATƏT-in Minsk qrupunun fəaliyyətinə son qoyulması üçün yetərlidir. Azərbaycan bununla bağlı öz mövqeyini bildirib və Ermənistan ağlını başına yığaraq bizimlə eyni yola gəlməlidir. Ermənistan isə prosesi yoxuşa aparmaqla sülhdən yayınmağa cəhd göstərir”.
