Bu gün Gürcüstanda əsas milli bayram - Müstəqillik Günü qeyd edilir.
Teleqraf-ın yerli bürosu xatırladır ki, 107 il bundan öncə - 1918-ci ilin mayın 26-da Milli Şuranın qərarı ilə Gürcüstan müstəqil respublika elan olunub.
Bayrama həsr olunan müxtəlif mədəni, maarifləndirici və idman tədbirləri Tbilisi ilə yanaşı bütün ölkə boyu keçiriləcək. Gürcüstan paytaxtının Azadlıq meydanında 700-ə yaxın çağırışçı təntənəli mərasimdə hərbi and içəcək, tədbir Tbilisidən başqa daha 5 tarixi məkanda təşkil olunacaq.
Tbilisi vaxtı ilə saat 17:10-da (107 il öncə müstəqilliyin elan edildiyi vaxt - red.) Gürcüstan prezidentinin sarayında dövlət himni oxunacaq.
Gürcüstan Prezidenti Mixeil Kavelaşvili və Baş nazir İrakli Kobaxidze rəsmi sosial şəbəkə hesablarında gürcü xalqını Müstəqillik Günü münasibəti ilə təbrik ediblər.
Qeyd edək ki, Noe Jordaniyanın başçılıq etdiyi Gürcüstanın ilk demokratik respublikası sovet işğalınadək – 1921-ci ilin fevralın 25-dək mövcud olub. Qonşu ölkə dövlət müstəqilliyini 70 ildən sonra - 1991-ci ilin aprelin 9-da bərpa edib.
