Gürcüstanın keçmiş prezidenti Mixeil Saakaşvilinin təsisçisi olduğu müxalif Vahid Milli Hərəkat Partiyasının (VMHP) ölkə konstitusiyasına zidd elan edilməsi prosesinə başlanılıb.
Teleqraf-ın yerli bürosu xəbər verir ki, Gürcüstan parlamentinin müvəqqəti komissiyası VMHP dövründə törədilmiş qanuna zidd əməllərə dair 430 səhifəlik hesabat hazırlayıb.
Sənəd qanunverici orqanın payız sessiyasının bugünkü ilk plenar iclasında müzakirəyə çıxarılacaq. Müzakirələrdən sonra hesabatın əsasında qətnamə qəbul ediləcək və Konstitusiya Məhkəməsinə şikayət hazırlanacaq.
Avqustun 5-də səlahiyyət müddəti başa çatmış müvəqqəti komissiya fəaliyyəti dövründə 46 iclas keçirib, 139 nəfəri dindirib.
Qeyd edək ki, bu ilin mayında Gürcüstanda qəbul olunmuş qanuna əsasən, partiyaların ləğvi ilə bağlı qərarı ölkənin Konstitusiya Məhkəməsi verir. Qərarın qəbulu üçün 14 günlük müddət müəyyən olunub.
Xatırladaq ki, M.Saakaşvili VMHP-ni 2001-ci ildə təsis edib. Siyasi birlik 2004-2012-ci illərdə Gürcüstanın hakim partiyası olub.
