Gürcüstan Türkiyə tərəfindən Suriyanın yeni hökumətinin Abxaziya və Tsxinvali bölgələrinin “müstəqilliyinin” tanınması ilə bağlı qərarın geri götürülməsi üçün vasitəçilik etməyi xahiş edib.
Teleqraf-ın yerli bürosu xəbər verir ki, bu barədə Gürcüstan parlamentinin Xarici əlaqələr komitəsinin sədri Nikoloz Samxaradze Ankarada jurnalistlərə bildirib.
Onun sözlərinə görə, Türkiyədə keçirilmiş görüşlərdə Gürcüstanın işğal altında olan ərazilərində vəziyyət də müzakirə olunub.
“Gürcüstanın Suriya ilə diplomatik əlaqələri yoxdur, çünki Əsəd rejimi Abxaziya və Tsxinvali bölgələrinin “müstəqilliyi”ni tanımışdı. Biz Suriya hakimiyyətinin bu tanınmanın geri çağırılması üçün Türkiyə tərəfindən vasitəçilik xahiş etdik. Bu qərardan sonra biz Suriya ilə diplomatik əlaqələrin bərpasına hazır olacağıq”, - N.Samxaradze söyləyib.
Xatırladaq ki, 2008-ci ilin avqust müharibəsi nəticəsində Rusiya Gürcüstanın iki bölgəsini - Abxaziya və Cənubi Osetiyanı işğal edib. Suriya bölgələrin “müstəqilliyini” 2018-ci ilin mayında tanıyıb. Dəməşqin bu qərarından sonra Gürcüstan Suriya ilə 1994-cü ildə qurulmuş diplomatik əlaqələri dayandırıb.
