“Gürcüstan Azərbaycanla Ermənistan arasında davam edən dialoqu diqqətlə izləyir. Biz tezliklə imzalanacağına ümid etdiyimiz sülh sazişini alqışlayırıq”.
Teleqraf-ın yerli bürosu xəbər verir ki, bunu Gürcüstanın xarici işlər naziri Maka Boçorişvili Azərbaycanın XİN rəhbəri Ceyhun Bayramovla keçirdiyi birgə brifinqdə deyib.
Nazirin sözlərinə görə, Gürcüstan bölgədə sülh və sabitliyin möhkəmləndirilməsində maraqlıdır.
“Regionda baş verən proseslər çox vacibdir. Bu kontekstdə ölkələrimiz arasında əməkdaşlıq və tərəfdaşlıq mühüm əhəmiyyət daşıyır. Bu gün mövcud olan geosiyasi vəziyyəti Gürcüstan və Azərbaycanın maraqlarının müdafiəsi, regionun digər dövlətləri ilə geniş əməkdaşlığın inkişaf etdirilməsi və bu vəziyyətdə ölkələrimizin malik olduğu potensialdan daha geniş istifadə edilməsi baxımından bir növ fürsət hesab edə bilərik”, - M.Boçorişvili söyləyib.
