Son iki il ərzində Zvartnots hava limanında sərnişinlərin sayı proqnozları əhəmiyyətli dərəcədə üstələyib və hazırda illik 5,5 milyonu ötüb.
Axar.az xəbər verir ki, bu barədə Ermənistan Beynəlxalq Hava Limanlarının baş direktoru Marselo Vende “Forbes”ə deyib.
O bildirib ki, terminal 3-4 milyon sərnişin üçün nəzərdə tutulub, ona görə də hazırda onun tutumunu iki dəfə artırmaq hədəflənir.
“Yeni terminal və yenidənqurma üçün 500 milyon dollar sərmayə qoymağı planlaşdırırıq. Qapıların sayı altıdan on altıya qədər artacaq. Gəliş zalları, immiqrasiya zonaları və gömrük sahələri iki dəfədən çox böyüyəcək. Biz müasir gözləmə otaqları əlavə edəcəyik, dayanacaqları genişləndirəcəyik və sərnişinlər üçün nəqliyyatı yaxşılaşdıracağıq. Biz həmçinin avtomatlaşdırılmış rəqəmsal pasport qapıları quraşdırmağa və Ermənistan vətəndaşlarının, xüsusən də Avropaya gediş-gəlişini asanlaşdıracaq yeni biometrik pasport sistemini tətbiq etməyə hazırlaşırıq”, - Vende qeyd edib.
