“Ermənistan heç vaxt və heç bir üçüncü tərəf qarşısında Ermənistan Konstitusiyasını dəyişdirmək öhdəliyi götürməyib və götürməyəcək”.
Teleqraf xəbər verir ki, bunu Ermənistan xarici işlər naziri Ararat Mirzoyan ATƏT-in hazırkı sədri Elina Valtonen ilə İrəvanda birgə mətbuat konfransında bildirib.
Bununla belə, nazir Ermənistan Konstitusiyasının dəyişdiriləcəyini bəyan edib.
“Bu, yalnız vətəndaşlarımızın qərarıdır və daxili siyasi gündəliyimizin bir hissəsidir. Bəli, Azərbaycan bu məsələni sülh sazişinin imzalanması üçün şərt kimi irəli sürməkdə davam edir. Biz isə bu şərti qəbul etmirik”, - Mirzoyan qeyd edib.
Xatırladaq ki, Ermənistan Konstitusiyasına müvafiq dəyişiklik yekun sülh sazişinin imzalanması üçün Azərbaycanın tələbidir.
Ermənistanın ədliyyə naziri bundan əvvəl Azərbaycana qarşı ərazi iddiasının yer aldığı Müstəqillik Bəyannaməsinə istinadın Konstitusiyadan çıxarıla biləcəyini istisna etməyib. Ermənistan Baş naziri Nikol Paşinyan isə 2026-cı ildə tamamilə yeni Konstitusiyanın qəbul olunacağını açıqlayıb.
