“Hər bir ölkənin tarixində elə məqamlar olur ki, yerindəcə və dərhal hərəkətə keçmək lazımdır”.
Bunu Gürcüstanın həbsdə olan keçmiş prezidenti Mixail Saakaşvili deyib.
Onun iddiasına görə, hazırkı hökumət qarşıdan gələn parlament seçkilərində növbəti dəfə qələbə qazansa, ölkədə müstəqil media və institutlar məhv ediləcək, çoxlu sayda həbslər olacaq.
“Bütün bunlar olarsa, ümumi ümidsizlik baş qaldıracaq və Qərb bizdən əl çəkəcək. Ona görə də ayın 4-də ayağa qalxmaq, ölkəmizi xilas etmək üçün son şansdır. Odur ki, 4-də gəlin və sona qədər dayanın. Azadlıq indi və ya heç vaxt”, - Saakaşvili vurğulayıb.
Oktyabrın 4-də Gürcüstanda bələdiyyə seçkiləri keçiriləcək. M.Saakaşvilinin Milli Hərəkat Partiyası həmin gün Tbilisidə izdihamlı mitinq və küçə yürüşləri elan edib. Partiya təmsilçiləri nümayişlər zamanı sərt addım ata biləcəklərini açıqlayıblar. Gürcüstan rəsmiləri mümkün hadisələri Saakaşvilinin hakimiyyətə qaytarılması üçün təxribatçı plan hesab edir.
Politoloq Elşad Həsənov Sherg.az-a bildirib ki, keçən il, oktyabrın 26-da Gürcüstanda parlament seçkiləri keçirilmişdi:
"Seçkinin nəticəsindən narazı qalan müxalifət bu günə qədər Tbilisidə etiraz aksiyalarını davam etdirir. Müxalifətin böyük bir hissəsi bu ilki seçkilərdə iştirak etmək istəmir. Onların fikrincə, iştirakın mənası yoxdur, çünki hakimiyyət hər halda bu seçkilərdə qalib gələcək. Buna görə də müxalifət sanki mübarizədən geri çəkilir. Saakaşvilinin “xalq ayağa qalxsın” çağırışına gəlincə, bu gün Gürcüstanda müxalifətin hakimiyyəti devirmək gücü yoxdur. Hazırkı hakimiyyət bəzi məqamlarla Rusiya ilə yaxın olsa da, əsasən Gürcüstan əhalisinin mövqeyini qorumağa çalışır. Ötən il parlament seçkilərində hakimiyyət Qərb qüvvələrinin ölkəni müharibəyə sürükləmək cəhdlərinə qarşı dayanaraq seçkidə qalib gəldi. Gürcü xalqı da bu siyasəti dəstəklədi və nəticədə hakim partiyanın namizədlərinin yerli seçkilərdə də daha çox səs qazanma şansı yüksək görünür. Nəticə isə əsasən xalqın səsverməyə gəlməsindən və orada iştirak etməsindən asılı olacaq".
