“Rusiya baş naziri Aleksey Overçukun İrəvanda keçirdiyi danışıqlar göstərdi ki, Ermənistan Avrasiya İqtisadi Birliyinin (AİB) mexanizmlərinin ritmik işləməsində maraqlıdır”.
Teleqraf xəbər verir ki, bunu Rusiya Xarici İşlər Nazirliyinin rəsmi nümayəndəsi Mariya Zaxarova deyib.
“Müzakirələrdə həm ikitərəfli formatda, həm də AİB formatında iqtisadi əməkdaşlığın bir çox aspektlərinə toxunulub. Müəyyən növ malların tədarükü məsələləri də müzakirə olunub. Bəzi nüansları anlamaq mümkün olub.
Eyni zamanda, vaxtaşırı müxtəlif Ermənistan rəsmiləri AİB ilə bağlı bəyanatlar verirlər: “çıxırıq”, “daxil oluruq”, “qalırıq”, “nə qədər qalacaqlar” və sair. Biz bu barədə şərh verməyəcəyik”, - Zaxarova vurğulayıb.
Xatırladaq ki, Ermənistan Baş naziri Nikol Paşinyan bundan öncə ölkəsinin AİB-dən çıxacağını istisna etməyib. Onun sözlərinə görə, AİB və Avropa İttifaqına eyni vaxtda üzv olmaq mümkün deyil. Paşinyan İrəvanın seçiminin Avropa İttifaqından yana olacağına eyham vurub.
