İran Prezidenti Məsud Pezeşkian Zəngəzur dəhlizi məsələsinə ölkənin Ali dini rəhbəri Əli Xamenei ilə müqayisədə daha yumşaq yanaşır.
Teleqraf xəbər verir ki, bu barədə “HayaQue” Teleqram kanalı (Ermənistan) yazıb.
“Qonşu İrandan dəhlizlə bağlı iki cür qiymətləndirmə eşidirik. Məsələn, Xameneinin baş müşaviri Əli Əkbər Vilayəti çox sərt mövqe bildirib, İran prezidenti isə bunun dəhliz deyil, tranzit marşrutu olduğunu bəyan edib”, - mənbə qeyd edib.
Bununla belə, M.Pezeşkianın Ermənistana son səfərinə toxunan kanal iddia edib ki, İranın siyasi lideri İrəvanda Baş nazir Nikol Paşinyanla məsələ ətrafında “sərt müzakirə” aparıb:
“Məlumata görə, Paşinyanla Pezeşkian arasında söhbət kifayət qədər sərt və çətin olub. Paşinyanı onları aldatmamağa çağırıblar. Ermənistan baş nazirinə bildirilib ki, ABŞ hərbçiləri dəhlizə nəzarət üçün bölgəyə girsələr, bu, İran üçün ciddi problem olacaq”.
