Ermənistan Baş naziri Nikol Paşinyanın ABŞ-a səfəri yeni administrasiya ilə müəyyən təmaslar yaratmaq, əhval-ruhiyyəni və münasibətlərin perspektivini öyrənmək məqsədi daşıyır.
Bu sözləri rusiyalı politoloq Konstantin Simonov Nikol Paşinyanın fevralda ABŞ-a səfər planının səbəbləri haqda danışarkən deyib.
O bildirib ki, Ermənistanın ciddi narahatlığı var və bunu Bayden administrasiyasının son günlərində sənədin (strateji tərəfdaşlıq haqda xartiya – red.) imzalanması da göstərdi:
“Əgər erməni tərəfi yeni rejimin Ermənistanla münasibətlərdə maraqlı olduğuna əmin olsaydı, o zaman sənəd yeni administrasiya ilə imzalanardı. Hazırda çoxlu qeyri-müəyyənlik var və yeni Dövlət Departamentinin Blinken qədər Cənubi Qafqazla maraqlanmayacağı ehtimal edilir.
Ancaq burada demək vacibdir: siyasətin effektivliyi nəticələrlə qiymətləndirilir. Blinkenin Dövlət Departamenti Cənubi Qafqazda hansı nəticələrə nail olub və Ermənistan həmin siyasətdən nə əldə edib: sülh bağlanmayıb, geosiyasi rəqabət güclənib, Rusiya və Azərbaycanla münasibətlərdə fikir ayrılıqları qalır, İranla da müəyyən anlaşılmazlıq var”.
Simonovun sözlərinə görə, ümumiyyətlə, Ermənistan hakimiyyəti bilmir ki, hansı istiqamətdə hərəkət etsin:
“Paşinyan hakimiyyəti əmin deyil ki, qərbyönlü siyasət Qərbə inteqrasiyaya aparacaq. Siz Zelenskinin son bəyanatlarını və NATO-ya üzvlüklə bağlı ümidsizliyini izləyə bilərsiniz. Qərb uzun müddət söz verdi, Ukraynanı Rusiyaya qarşı təhrik etdi və hazırda Ukraynaya heç bir aydın perspektiv təqdim etmir. Bu, Qərb siyasətinin ən yaxşı nümunəsidir”.
Politoloq İlqar Vəlizadə "Sherg.az"a deyib ki, ABŞ-Ermənistan münasibətləri Trampın yeni hakimiyyəti dövründə dəyişikliyə məruz qalacaq:
"İki ölkə arasındakı əlaqələr irəliləyən zamanda müəyyən dərəcədə təftiş olunması qaçılmazdır. Ümumiyyətlə Tramp administrasiyası bütün ölkələrlə, o cümlədən Cənubi Qafqazda yerləşən dövlətlərlə yeni münasibətlər qurmaq niyyətində olacaq. Bu da nəticə etibarilə Ermənistanla bağlantı və tərəfdaşlığın inspeksiyasına səbəb verəcək. Digər tərəfdən məsələlərin inkişaf və prosesin zamanla bəlli olacağı gözlənilir. Bütün hallarda Paşinyanın əsas qorxusu da əlaqələrin nəzərdən keçiriləcəyi halda ABŞ ilə imzalanan xartiyaya minimum təsir edəcəyidir".
