“Ermənistan müxalifəti çarəsizdir, içi nifrət doludur”.
Bunu Ermənistan Baş naziri Nikol Paşinyan deyib.
“Bəzi müxalif dairələrin əsas bəyanatı odur ki, Ermənistanda gərginlik, apatiya, nifrət var. Vardavar kütləvi şənliklərinin səhnələrinə baxıram və özümə sual verirəm: hanı gərginlik, apatiya, nifrət?
Psevdoelit qrupun apatiyası, gərginliyi, nifrət və çarəsizliyi xalqa aid olunmamalıdır. 2021-ci ildə xalq gələcəyin olduğuna inanırdı, bu gün anlayır ki, gələcək gəlib, gələcək bu gündür”, - baş nazir qeyd edib.
Qeyd edək ki, Vardavar Ermənistanda insanların bir-birini su ilə islatdıqları festivaldır.
Siyasi elmlər üzrə fəlsəfə doktoru, politoloq Şəbnəm Həsənova Sherg.az-a bildirib ki, Ermənistanda seçkilər yaxınlaşdıqca təzyiqlər yüksəlir:
"Belə ki, Nikol Paşinyana rəqib olan qüvvələr həm daxili, həm də xarici alətləri işə salaraq onu zəiflətməyə çalışırlar. Bu istiqamətdə isə, şübhəsiz ki, ən möhkəm divar cəmiyyətdir. Cəmiyyətdə Paşinyana qarşı hər hansı bir fikir formalaşdırılması müxalifətin işinə yarayan üsul və metoddur. Bu baxımdan, Vardavar kütləvi şənliklərindəki səhnələri şərh edən Paşinyan cəmiyyətdə heç bir gərginliyin olmamasını bildirir. Həmçinin Ermənistan Baş naziri əslində bununla göstərir ki, cəmiyyət onun arxasındadır. Bu məqamda Paşinyanın ilk ümid etdiyi qüvvə məhz cəmiyyətdir, kütlədir – onların səs çoxluğunu qazanmaq istəyir. Paşinyanın hakimiyyətdə qalması erməni cəmiyyəti üçün vacib məsələdir. Çünki Paşinyan bir kurs götürüb yola çıxıb və bu yolun sona çatdırılması, kursun reallaşdırılması zəruridir".
Analitik əlavə edib ki, Paşinyan artıq əsas oyunçularla müəyyən məsələləri xarici siyasət sahəsində yola qoyduğunu nümayiş etdirir:
"Bu baxımdan onun hakimiyyətdə qalması erməni cəmiyyətinin seçimidir. Paşinyanın da dediyi kimi, bu, cəmiyyətin yalançı miflərdən, uydurma ideologiyalardan təmizlənməsinə xidmət edəcək. Müxalifət isə, həm Rusiyadan, həm də Qərbdən, o cümlədən erməni diasporundan dəstək alır. Odur ki, bu dəstəyə ümid edərək Paşinyan əleyhinə müəyyən kampaniyalar formalaşdırır, ətraflarında dəstək qrupları yığmağa çalışırlar. Digər bir amil isə budur ki, Paşinyan Rusiya lideri Vladimir Putinlə görüşə ümid edirdi. Amma bu görüşdən əli boş qayıtdı. Nikol hər nə qədər Qərbyönümlü siyasət yürütsə də, hər nə qədər istiqaməti bəlli olsa da, onun üçün ilk məqam öz siyasi hakimiyyətini qoruyub saxlamaqdır. Buna görə tam gərginliyə getmir. Bütövlükdə isə Paşinyanın qarşısında duran əsas məsələ hakimiyyətini qorumaqdır. Onun bu istiqamətdə ən böyük dayağı xalqdır. Paşinyan da məhz bunu göstərməyə çalışır".
