“Rusiya və Ermənistan arasında yüksək səviyyəli dialoqda “Tramp yolu” (və ya Zəngəzur dəhlizi - red.) məsələsi müzakirə olunur”.
Bu barədə Rusiyanın Ermənistandakı səfiri Sergey Kopırkin bildirib.
“Əlbəttə, bu məsələ yüksək səviyyəli dialoq çərçivəsində qaldırılır. Elə bir mövzudur ki, bu, qaldırılmaya bilməz. Ermənistan rəhbərliyinin (Baş nazir Nikol Paşinyan və xarici işlər naziri Ararat Mirzoyanın - red.) bu məsələnin yalnız ABŞ ilə müzakirə olunduğu barədə bəyanatlarını xatırlatmaq istərdim. Amma bu mövzu vacibdir və əlbəttə, bizim yüksək səviyyəli dialoqumuzda da öz əksini tapmaya bilməz”, - rusiyalı diplomat vurğulayıb.
Kopırkin həmçinin qeyd edib ki, Moskvanın müxtəlif siyasi səviyyələrdə səslənən fundamental mövqeyi regionda real sülhə, vəziyyətin sabitləşməsi və çiçəklənməyə aparan istənilən addımı dəstəkləməkdir.
“Tramp yolu” adlanan marşruta gəlincə, əməliyyat detalları və mexanizmləri haqqında daha konkret məlumat gözləyirik. Əvvəlcə bunun konkret olaraq nə olduğunu anlamalıyıq”, - səfir əlavə edib.
Politoloq Kazım Kazımov Sherg.az-a bildirib ki, Rusiyanın “dialoq” deyəndə nəyi nəzərdə tutduğu aydın ifadə olunmayıb və fikirlər səthi səslənir:
"Çünki Rusiya bu koridordan və ya dəhlizdən istifadə etmək istəyirsə, ilk növbədə həm Azərbaycan, həm də Ermənistanla razılıq əldə etməlidir. Bu məsələ birbaşa olaraq iki ölkə arasında həll olunmalı bir mövzudur. Eyni zamanda, ABŞ da bu prosesdə vasitəçi tərəf kimi çıxış edir. Lakin Rusiyanın bu dəhlizdə yönləndirici və ya aparıcı rol almaq istəyi, absurddur. Çünki bu proses həmin ölkənin ərazisində baş vermir, danışıqlar əvvəlcədən Moskva ilə aparılmayıb və vasitəçi tərəf də deyil. Rusiya burada sadəcə tranzitdən istifadə etmək istəyən qonşu ölkə kimi iştirak edə bilər. Bu, tamamilə mümkündür. Necə ki, Orta Asiya, Uzaq Şərq və Avropa ölkələri bu dəhlizdən istifadə imkanına malikdirlər, Rusiya da eyni qaydada bundan yararlana bilər. Amma bundan artığını istəməsi məqsədəuyğun deyil. Çünki Rusiyanın buna nə hüquqi, nə də siyasi əsasları var. Bu məsələ artıq həllini tapıb. Cənab Prezident İlham Əliyevin səyləri nəticəsində Vaşinqtonda, Ağ Evdə ən yüksək səviyyədə sənədlər imzalanıb və proses Azərbaycanın istədiyi istiqamətdə Ermənistanla birlikdə irəliləyir".
