“Azərbaycan və Ermənistana Şanxay Əməkdaşlıq Təşkilatına (ŞƏT) üzvlüyün verilməsi məsələsi təşkilat tərəfindən nəzərdən keçirilir”.
Teleqraf xəbər verir ki, bunu Hindistan Xarici İşlər Nazirliyinin rəsmi nümayəndəsi Rancir Caysval deyib.
Bundan əvvəl mətbuat Hindistanın Azərbaycanın təşkilata tamhüquqlu üzv kimi daxil olmaq üçün müraciətini, Pakistanın isə Ermənistanın müraciətini əngəllədiyini yazıb. Eyni zamanda, Ermənistan Xarici İşlər Nazirliyi İslamabadın hərəkətlərini şərh etməkdən yayınıb və bildirib ki, hazırkı mərhələdə onlar prosesin təfərrüatlarına varmırlar, Ermənistanın üzvlüyünə kifayət qədər konstruktiv yanaşmanı müşahidə edirlər.
“Bu il həm Ermənistan, həm də Azərbaycan ŞƏT-ə üzv olmaq üçün müraciət edib. Vaxt məhdudiyyəti səbəbindən bu məsələ ilə bağlı qərar Çinin Tiencin şəhərində üzv dövlətlər tərəfindən qəbul oluna bilmədi. Lakin hər iki ölkənin üzvlük məsələsi hələ də təşkilat tərəfindən nəzərdən keçirilir”, - o, Hindistanın Azərbaycanın ŞƏT-ə üzvlüyünü əngəlləməsi ilə bağlı mətbuatda yayılan xəbərlərlə bağlı sualı cavablandırarkən bildirib.
Xatırladaq ki, Hindistan ŞƏT-in avqustun 31-də Çinin Tiencin şəhərində keçirilən sammitində Azərbaycanın bu quruma üzvlük müraciətinə veto qoyub. Pakistan da buna cavab olaraq, Ermənistan üçün eyni addımı atıb.
