“Seçkilərə 8 aya yaxın vaxt qalıb, amma biz müxalifətin “növbədənkənar seçkilər” dediyini eşidirik. Onlar seçilməyəcəklərini, uduzacaqlarını bilirlər”.
Teleqraf xəbər verir ki, bunu Ermənistan parlamentinin sədri Alen Simonyan jurnalistlərlə söhbətində deyib.
Onun sözlərinə görə, hakim “Vətəndaş Müqaviləsi” Partiyası günü sabah erkən seçkiyə gedə bilər, amma buna ehtiyac yoxdur.
“İkincisi, xalqımız beş illik müddəti bizə həvalə edib ki, bu da xalqımıza qarşı dürüstlük olmazdı”, - spiker bildirib.
Alen Simonyan qeyd edib ki, əgər əvvəllər 50+1 səs alacaqlarını düşünürdüsə, indi 2021-ci il seçkilərindən daha çox səs alacaqlarına əmindir:
“Buna səbəb avqustun 8-də ABŞ-də (Azərbaycanla) imzalanan saziş olacaq”.
Həmçinin o əlavə edib ki, hakim partiya istəsə, izdihamlı yürüş keçirə bilər.
Xatırladaq ki, bu gün Ermənistan parlamentində Baş nazir Nikol Paşinyana qarşı impiçment təşəbbüsü ilə bağlı müxalifət fraksiyalarının dinləmələri keçirilib.
