Donald Trampın 12 ölkənin vətəndaşlarının ABŞ-yə səyahətini qadağan edən qərarı qüvvəyə minib.
Teleqraf xəbər verir ki, Afrika və Yaxın Şərqdən olan 12 ölkənin vətəndaşlarını əhatə edən bu səyahət qadağası ABŞ-də miqrasiya ilə bağlı gərginliyin artdığı bir dövrdə tətbiq olunmağa başlanacaq. Los-Ancelesdəki sərhəd etirazlarının 3-cü günündə Tramp milli təhlükəsizlik üçün təhdidləri əsas gətirərək, verdiyi səyahət qadağası qərarını icraya verib.
Bildirilib ki, Tramp iyunun 5-də adıçəkilən qadağanı ehtiva edən bir sərəncamı imzalayıb.
Sərəncama əsasən, Əfqanıstan, Myanma, Çad, Konqo Respublikası, Ekvator Qvineyası, Eritreya, Haiti, İran, Liviya, Somali, Sudan və Yəmən vətəndaşlarının ABŞ-yə səyahətinə qadağa qoyulub.
Bundan əlavə, Tramp Burundi, Kuba, Laos, Syerra Leone, Toqo, Türkmənistan və Venesuela vətəndaşlarına da səyahət məhdudiyyətləri tətbiq edib.
Digər tərəfdən, ABŞ-də qanuni şəkildə yaşayan və ya etibarlı vizası olan, həmçinin ABŞ-nin milli maraqlarına xidmət edən bu 19 ölkənin vətəndaşları sərəncamın əhatə dairəsinə daxil edilməyib.
Donald Tramp Ağ Evin "X" sosial media hesabında etdiyi paylaşımda qeyd edib: "Bizə zərər vermək istəyən insanların ölkəmizə girməsinə icazə verməyəcəyik".
O həmçinin qeyd edib ki, səyahət məhdudiyyəti tətbiq edilən ölkələrin sayı zərurət yaranarsa, dəyişdirilə bilər və yeni təhdidlər ortaya çıxdıqca siyahıya başqa ölkələr də əlavə edilə bilər.
